Sosial

Ana səhifə

Sosial

Qori Seminariyasının Azərbaycan şöbəsinin 130 və Qazax Seminariyasının 90 illik yubileyinə həsr olunmuş konfrans keçirilir

15 may 2009 11:45 (UTC +04:00)

Bakı. İlhamə İsabalayeva – APA. Bakıda Zaqafqaziya (Qori) Müəllimlər Seminariyası Azərbaycan şöbəsinin 130 və Qazax Müəllimlər Seminariyasının 90 illik yubileyinə həsr olunmuş beynəlxalq elmi-praktik konfrans başlayıb. APA-nın məlumatına görə, Azərbaycan Beynəlxalq Universitetinin rektoru Elşad Abdullayev deyib ki, iki gün davam edəcək konfransda Azərbaycanla yanaşı, Rusiya, Özbəkistan, Tacikistandan qonaqlar, eyni zamanda Gürcüstan və Rusiyanın Azərbaycandakı səfirliklərinin nümayəndələri iştirak edir. Rektor bildirib ki, Qori Müəllimlər Seminariyası, Qazax Müəllimlər Seminariyası və onların məzunları Azərbaycanın pedaqoji fəaliyyət tarixində, mədəniyyətində mühüm rol oynayıblar. Fəaliyyət göstərdiyi 35 il ərzində Qori Seminariyası Azərbaycana 250 nəfərdən artıq ziyalı bəxş edib. Onların arasında Üzeyir Hacıbəyli, Firudin Köçərli, Cəlil Məmmədquluzadə, Süleyman Sani Axundov, Nəriman Nərimanov, Müslüm Maqomayev kimi şəxsiyyətlər var.

Qori Müəllimlər Seminariyasının Azərbaycan şöbəsinin yaranma tarixinin tədqiq edən ABU-nin birinci prorektoru Hüseyn Əhmədov isə qeyd edib ki, bu məktəb Azərbaycan üçün müəllim kadrları hazırlayan ilk təhsil müəssisəsi olub: “XIX əsrin 70-ci illərinə qədər Azərbaycanda müəllim kadrı hazırlayan nə institut, nə də texnikum olub. Azərbaycandakı məktəblərdə dərs deyənlər ruhani təhsili alan müəllimlər idi. Hər kəs məsciddə, evdə dərs deyirdi. Lakin XIX əsrin əvvəllərində Azərbaycan Rusiya tərəfindən işğal edildikdən sonra çar Rusiyası belə şəxslərin dövlət qulluğuna yaramadığını gördü. 1829-cu ilin avqustunda Zaqafqaziya məktəblərinin ilk Nizamnaməsi təsdiqləndi. Ondan sonra Şəki, Gəncə, Şamaxı, Naxçıvan və digər yerlərdə məktəblər açıldı. Azərbaycan dili də bu məktəblərin tədris planına daxil edilmişdi”.