Sosial

Ana səhifə

Sosial

Tomas Qoltz azərbaycanlı ekoloqlar üçün Yellostoun Milli Parkı haqqında təqdimat mərasimi keçirib - FOTOSESSİYA

Tomas Qoltz azərbaycanlı ekoloqlar üçün Yellostoun Milli Parkı haqqında təqdimat mərasimi keçirib - <font color=red>FOTOSESSİYA</font>

08 iyun 2009 07:26 (UTC +04:00)

Montana. Zaur Həsənov-APA. “Azərbaycan gündəliyi” kitabının müəllifi Tomas Qoltz ABŞ-da səfərdə olan Ekologiya və Təbii Sərvətlər Nazirliyinin əməkdaşları üçün öz evində məşhur Yellostoun Milli Parkı haqqında təqdimat mərasimi keçirib. Qeyd edək ki, cənab Qoltzun dərs dediyi Montana Dövlət Universiteti (Bozeman şəhəri) adı çəkilən parkın yaxınlığında yerləşir.

Tomas Qoltz milli parkın tarixçəsi, təbiətin qorunması üçün istifadə olunan texnologiyalar haqqında ətraflı danışıb. Daha sonra o qonaqlarla parka gəzintiyə çıxaraq buranın ən cəlbedici yerləri olan isti bulaqlara baş çəkib, bizonlar, canavarlar, və ayıları seyr ediblər. Daha sonra Montana Universitetinin Siyasi Elmlər Departamentinin rəhbəri Cerry Jonson ( Dr.Jerry Johnson) Milli Parkın istismarının iqtisadi əsasları, Amerika İctimai Televiziyasının ekoloji məsələlər üzrə ixtisaslaşan prodüseri Bil Kempbell (Bill Campbell), “Ayının izi” kitabının müəllifi Skot Makmillion (Scott McMillion) park haqqında geniş danışıblar.

Təqdimatdan sonra Tomas Qoltz Bakıdan gələnlər üçün Azərbaycan mətbəxinin nümunələri olan yeməklərdən ibarət şam yeməyi təşkil edib, onlara öz evində Azərbaycana həsr etdiyi guşəni nümayiş etdirib, 1991-1994-ci illər ərzində Dağlıq Qarabağdan hazırladığı reportajlar barədə məlumat verib. Şam yeməyində Montana Dövlət Universitetinin professorları Bob Ebinqer (Bob Ebinger) və Frank Vilmer (Frank Wilmer), universitetin tələbələri, Xarici Qonaqlar üçün Montana Mərkəzinin icraçı direktoru Meqan Makkothlin (Megan McGlothlin) və 50 yaxın digər qonaqlar iştirak ediblər.

Qeyd edək ki, Azərbaycan ekoloqları ABŞ-ın “Açıq Dünya” proqramının təşəbbüsü ilə amerikalı həmkarları ilə təcrübə mübadiləsi aparmaq üçün Montana ştatına gəliblər. Azərbaycan ekoloqlarının nümayəndə heyətinə Azərbaycan Ekologiya və Təbii Sərvətlər Nazirliyinin Meşə Təsərrüfatının İnkişafı departamentinin əməkdaşı Bahadır Vəkilov, “Qala” dövlət tarixi etnoqrafik qoruğunun direktoru Fikrət Abdullayev, Azərbaycan Turizm İnstitutunun dekan müavini Anar Fərmayılov və Şirvan Milli Parkının direktor əvəzi Seymur Kərimov daxildir.