Sosial

Ana səhifə

Sosial

Azərbaycanda təxminən 1,891 mln. nəfər pensiyanı plastik kartla alır

09 iyun 2009 10:03 (UTC +04:00)

Bakı. Nicat Mustafayev – APA-Economics. Bu ilin yanvar-may ayları ərzində Azərbaycanda əmək pensiyasını plastik kartla əldə edənlərin sayı 31 986 nəfər artıb.

Azərbaycan Dövlət Sosial Müdafiə Fondunun (DSMF) sektor müdiri Elman Babayevin «APA-Economics»ə verdiyi məlumata görə, artıq ödənişdə olan pensiyaların 96,3%-i, yəni ümumilikdə 1 890 557 nəfərin pensiyasının ödənişi plastik kartla həyata keçirilir.

E.Babayev həmçinin qeyd edib ki, şəhər yerində yaşayan pensiyaçıların 100%-i üzrə pensiyalar plastik kartla ödənilir: «Cari ildə kəndlərdə vətəndaşların öz xahişləri əsasında (istənilən bankomatdan alma şərti ilə) pensiyaların plastik kartlarla ödənişinin təmin olunması istiqamətində işlər davam etdirilib. Belə ki, əgər bu ilin yanvarın 1-nə olan statistikaya əsasən, ölkə üzrə kənd əhalisinin 88,9%-i plastik kartla təmin olunmuşdusa, artıq bu göstərici 92,5%-ə çatıb. Ümumiyyətlə, qeyd olunan bu göstəricilər üzrə Azərbaycan bütün dünyada ən şəffaf praktikaya malik ölkələrdən biri hesab olunur».

Xatırladaq ki, Azərbaycanda sığorta-pensiya sisteminin inkişafına dair Dövlət Proqramına (2009-2015-ci illər) əsasən, növbəti illər ərzində pensiyaların plastik kartlarla bankomatlar vasitəsilə ödənilməsi sisteminin təkmilləşdirilməsi davam etdiriləcək, bankomat və POS-terminallarla təchizat gücləndiriləcək, ödənişlərdə çoxfunksiyalı çip-kartlardan istifadə təmin olunacaq, ucqar kəndlərdə ödənişin mütərəqqi üsullarla aparılması üzrə müxtəlif ölkələrin təcrübəsi öyrənilərək tətbiq ediləcək.