Sosial

Ana səhifə

Sosial

Ətraf Mühit üzrə Milli Monitorinq Departamenti tərəfindən atmosfer havasının çirklənməsinin monitorinqi keçirilib

10 iyun 2009 09:02 (UTC +04:00)

Bakı. Kəmalə Quliyeva – APA. Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamenti tərəfindən mayın 23-dən iyunun 5-dək atmosfer havasının çirklənməsinin monitorinqinə dair Bakının Xətai, Nizami, Binəqədi rayonlarının ərazisində reydlər keçirilib.

ETSN-nin mətbuat xidmətindən APA-ya verilən məlumata görə, monitorinq zamanı Xətai rayonunun Gəncə prospekti 20, 23, 67, 103, 105, Babək prospekti 33, General Şıxlinski 36, 38 ünvanlarında, Ukrayna dairəsinin yaxınlığında, 25 saylı orta məktəbin ərazisində; 7-ci mikrorayonun Xarici dairəvi küçəsi, 3123-cü məhəllədə, 1604-cü keçid, bina 11 A-da, Nizami rayonunun 12 №-li peşə məktəbinin ərazisində məişət tullantılarının yandırılması halları qeydə alınıb. Məişət tullantılarının yaşayış massivlərində yandırılması günün müxtəlif vaxtlarında, əsasən də səhər və gecə saatlarında baş verdiyi müşahidə edilib.

Məişət və tikinti-inşaat tullantılarının tərkibində xlorlu birləşmələr olan plastik qabların yanmasından və digər kimyəvi maddələrin parçalanmasından atmosferə və yer səthinə böyük həcmdə kanserogen maddələr və davamlı üzvi çirkləndiricilər olan dioksinlər və furanlar atılıb ki, bu da əhalinin sağlamlığı üçün olduqca təhlükəlidir.

Aparılmış monitorinqlər zamanı tullantıların yaşıllıq zolaqlarında yandırılması halları da qeydə alınıb. Bu da atmosfer havasını çirkləndirməklə bərabər, havanın təmizlənməsində filtr funksiyasını yerinə yetirən ağacların qurumasına gətirib çıxarır.