Sosial

Ana səhifə

Sosial

Bakı və Xaçmazda keçirilən monitorinqlər zamanı bir sıra ticarət obyektlərində keyfiyyətsiz məhsulların satılması faktı aşkarlanıb

13 iyul 2009 10:42 (UTC +04:00)

Bakı. Rəşad Süleymanov – APA-Economics. Azərbaycan İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidmətinin Bakıda və rayonlarda keçirdiyi monitorinqlər zamanı bir sıra ticarət obyektlərində keyfiyyətsiz məhsulların satılması faktı aşkarlanıb. Bu barədə «APA-Economics»ə İqtisadi İnkişaf Nazirliyinin mətbuat xidmətindən məlumat verilib.

Araşdırmalar zamanı Bakının Xətai rayonunda yerləşən “İnci market”də, “VİP market”də, “Riyad Market”də, “Azles” MMC-yə məxsus “Savalan market”də, “Endi Market”də, “Azər market”də və Xaçmaz rayonunun Nabran qəsəbəsində yerləşən “Qafqaz” pərakəndə ticarət mağazasında ümumi çəkisi 200 kiloqrama yaxın saxlama müddəti ötmüş ərzaq məhsulları - kolbasa və qənnadı məmulatları, kərə yağları, süd və süd məhsulları, sərinləşdirici içkilər, ketçuplar, mayonezlər, həmçinin kosmetik vasitələr aşkarlanıb. Həmin məhsullar satışdan çıxarılaraq məhv edilib.

Qanunvericiliyin tələbini pozmuş 1 hüquqi və 6 fiziki şəxs barədə inzibati xəta haqqında protokol tərtib edilib. Həmin şəxslər barəsində qanunvericilik qaydasında inzibati cərimələr tətbiq olunacaq.

Qeyd edək ki, mayın 17-dən bu günədək keçirilən nəzarət tədbirləri zamanı qanun pozuntusuna yol verdiyi müəyyən edilmiş 34 hüquqi şəxsə 132,5 min manat, 161 fiziki şəxsə 242 min manat cərimə tətbiq olunub.