Sosial

Ana səhifə

Sosial

Cəlilabadda eneolit dövrünə aid maddi-mədəniyyət nümunələri aşkarlanıb

13 iyul 2009 14:12 (UTC +04:00)

Cəlilabad. Ağəddin Babayev – APA. Cəlilabad rayonunun Üçtəpə kəndi ərazisində aparılan arxeoloji qazıntılar zamanı Azərbaycan tarixinin qədimliyini sübüt edən daha bir abidələr silsiləsi aşkarlanıb. Bu barədə məlumatı APA-nın cənub bürosuna Azərbaycan Milli Elmlər Akademiyasının (AMEA) Arxeologiya Və Etnoqrafiya İnstitutunun elmi işçisi, tarix elmləri namizədi Xaqani Alməmmədov verib.
Onun sözlərinə görə, aşkarlanan Alxantəpə yaşayış məskəni eramızdan əvvəl beşinci minilliyə aiddir. Bu isə mis daş dövrünə təsadüf edir. Ekspedisiya 6 hektar ərazidə aparılır, qazıntılar isə 500 kv. metrlik sahəni əhatə edir. Təpənin mərkəzində təqribən 160 kv. metr sahədə qazıntı işləri görülüb. Bu zaman abidənin mədəni təbəqəsinin qalınlığı 4-5 metrə çatıb. Əsas qazıntı sahəsində mədəni təbəqə 50 santimetrdir. Bundan başqa, ekspedisiya qrupu ərazidən 50-yə qədər müxtəlif abidələr, 5 təsərrüfat quyusu, 6 dulusçu kürəsi və 30-a yaxın ayrı-ayrı dövrlərə aid maddi-mədəniyyət nümunələri aşkar edib.
AMEA-nın əməkdaşının qənaətincə, ekspedisiya qrupunun 5 illik planı çərçivəsində tədqiq olunan ərazilərin topoplanı çıxarılacaq, mədəni təbəqənin qalınlığı öyrəniləcək və aşkar edilmiş maddi-mədəniyyət nümunələri arasında Muğanın neolit-eneolit abidələrinin elektron bazası yaradılacaq. Araşdırmalar nəticəsində Muğanda uzun illər bundan qabaq da mükəmməl tikinti texnikasının mövcud olduğu aşkarlanıb.