Sosial

Ana səhifə

Sosial

Səfərbərlik və dövlət ehtiyatlarının yığılması dövlət büdcə vəsaiti hesabına maliyyələşdiriləcək

14 iyul 2009 10:57 (UTC +04:00)

Bakı. Rəşad Süleymanov – APA-Economics. Azərbaycan Nazirlər Kabineti «Maddi sərvətlərin səfərbərlik və dövlət ehtiyatlarının, habelə ərzaq mallarının və neft məhsullarının azaldılmaz ehtiyatlarının yaradılması, yığılması, saxlanılması, təzələnməsi və istifadə olunması» qaydalarını təsdiq edib. Bu barədə «APA-Economics»ə Nazirlər Kabinetindən məlumat verilib.

Qaydalara əsasən, səfərbərlik və dövlət ehtiyatlarının, habelə ərzaq mallarının və neft məhsullarının azaldılmaz ehtiyatlarının həcmi və nomenklaturu İqtisadi İnkişaf Nazirliyi tərəfindən Müdafiə, Müdafiə Sənayesi, Nəqliyyat, Sənaye və Energetika, Səhiyyə, Kənd Təsərrüfatı, Fövqəladə Hallar nazirlikləri və digər aidiyyəti orqanların iştirakı ilə hazırlanacaq.

Səfərbərlik və dövlət ehtiyatlarının yığılması bu məqsədlər üçün ayrılan dövlət büdcə vəsaiti hesabına maliyyələşdiriləcək. Səfərbərlik və dövlət ehtiyatlarının yığılması dövlət sifarişçisi - Fövqəladə Hallar Nazirliyi (FHN) tərəfindən həyata keçiriləcək.

Qaydalara əsasən, FHN tərəfindən səfərbərlik və dövlət ehtiyatlarını saxlayan cavabdeh qurumlarda maddi sərvətlərin kəmiyyəti, keyfiyyəti və saxlama şəraiti mütəmadi olaraq yoxlanılacaq. Saxlanılma müddəti başa çatmaqda olan maddi sərvətlər hərrac və digər vasitələrlə yenilənə bilər.

Sənədə uyğun olaraq FHN tərəfindən səfərbərlik və dövlət ehtiyatlarının hərəkəti və mövcudluğunun icmal uçotu aparılacaq, habelə «Büdcə Təşkilatları üçün Milli Mühasibat Uçotu Standartları»na uyğun olaraq maliyyə hesabatları hazırlanıb hökumətə təqdim ediləcək.