Sosial

Ana səhifə

Sosial

Gəncədə Sahil parkının açılışı olub

15 iyul 2009 07:37 (UTC +04:00)

Gəncə. Cəmşid Bəxtiyar - APA. Gəncə şəhərində Nizami və T.Arani küçələrinin kəsişməsində yerləşən Sahil parkında aparılan abadlıq-bərpa işləri artıq başa çatıb. APA-nın qərb bürosunun məlumatına görə, iyulun 14-də saat 18-də Gəncə şəhər İcra Hakimiyyətinin başçısı Eldar Əzizovun iştirakı ilə parkın aşılış mərasimi keçırılıb. Mərasimdə şəhərin idarə, müəssisə və təşkilat rəhbərləri, parkın yaxınlağındakı ticarət obyektlərinin sahibləri, yerli sakinlər və şəhər ziyalıları da iştirak edib.
Gəncəçayın sağ sahilində yerləşən və 28 000 kv. m ərazini əhatə edən parkda yeni fəvvarə, oturacaqlar quraşdırılıb, 200-dən çox yeni ağac əkilib. Parkın suvarılması üçün elə oradaca vurulan yeni subartezian quyusundan istifadə ediləcək.
E.Əzizov APA-nın qərb bürosuna bildirib ki, bu park daha iri bir layihənin tərkib hissəsi və gerçəkləşdirilən ilkin mərhələsidir: “Layihəyə görə, bu park H.Əliyev prospektindən M.A.Abbaszadə küçəsinə qədər uzanacaq və böyük bir bulvar kimi formalaşacaq”. İcra başçısının dediyinə görə, Gəncəçayın park boyunca uzanan hissəsində də dəyişikliklər ediləcək və çayın suyunun səviyyəsini yüksəldərək hövzəsinin genişlənməsi yönündə işlər aparılacaq: “Təbii ki, bunlar hamısı çoxlu vəsait tələb edir və bugünkü maliyyə böhranı bu yöndə müəyyən problemlər vəd edir. Amma inanıram ki, bütün gəncəlilərin arzusu olan bu xeyirxah iş uğurla nəticələnəcək”.
Park hələ ki, Sahil parkı adlanacaq. Amma E.Əzizov APA-nın sualını cavablandırarkən onun Zərifə Əliyevanın adını daşıyacağını da istisna etməyib: “Park layihəsi tam gerçəkləşdikdən sonra onun adı barədə də yəqin ki, fikirləşəcəyik. Əgər belə bir təklif olarsa, onun diqqətə alınacağı istisna deyil”.
Parkın açılışı icra başçısı ilə yerli iş adamlarının və sakinlərin açıq mikrofonla dialoqu kimi davam edib. İştirakçılar icra başçısına öz ürək sözlərini, şikayət və təkliflərini açıq mikrofon vasitəsilə bildiriblər.