Sosial

Ana səhifə

Sosial

Nazir: “Kənd təsərrüfatı məhsulları əvvəlki illərlə müqayisədə çox ucuzlaşıb”

19 fevral 2010 16:25 (UTC +04:00)

Yevlax. Teymur Zahidoğlu-APA. Bu gün Yevlaxda kənd təsərrüfatı heyvanlarının süni mayalanma texniklərinin ümumrespublika seminar-müşavirəsi keçirilib. APA-nın Qarabağ bürosunun məlumatına görə, tədbirdə respublikanın bütün kənd təsərrüfatı rayonlarından olan mütəxəssislər və rayon icra hakimiyyəti başçılarının aqrar məsələlər üzrə müavinləri iştirak ediblər. Müşavirəyə kənd təsərrüfatı naziri İsmət Abbasov rəhbərlik edib. Nazir kənd təsərrüfatı mütəxəssisləri ilə ölkədə bu sahənin mövcud vəziyyətinin müzakirə edib.
Müşavirədən sonra İ. Abbasov jurnalistlərin suallarını cavablandırıb. Kənd təsərrüfatı məhsullarının bahalaşmasına dair suala cavab olaraq nazir deyib ki, indiki qiymətləri bahalıq kimi qiymətləndirmək düz deyil: «Mən düşünmürəm ki, son vaxtlar kənd təsərrüfatı məhsullarının satış qiymətində bahalaşma var. Əksinə, son iki üç ildə ölkədə kənd təsərrüfatı sahəsinə dövlət qayğısı nəticəsində kənd təsərrüfatı məhsullarının istehsalı intensiv şəkildə artıb. Bu məhsulların indiki qiymətləri ötən illərdəki qiymətlərdən kəskin şəkildə fərqlənir. İndi bu çeşiddən olan məhsullar çox ucuzdur».

Respublikanın pambıqçılıq rayonlarında bu sahənin qismən sıradan çıxmasına münasibət bildirən nazir deyib ki, bu il dünya bazarında pambığa tələbatın artdığı və mahlıcın qiymətində yüksəlmə müşahidə olunur: «Belə olan halda, ölkədə pambıqçılıq üzrə fəaliyyət göstərən səhmdar cəmiyyətlər fermerləri bu ildən başlayaraq pambıq əkməyə maraqlandıracaqlar. Mən düşünürəm ki, həmin səhmdarlar fermerlərə pambıqçılığın inkişafı üçün lazımi səviyyədə maliyyə vəsaiti ilə kömək edəcəklər».

Taxıl istehsalçılarına dövlət büdcəsindən ayrılan hər hektar üçün 40 manat həcmində birdəfəlik yardımların gecikməsinə münasibət bildirən İ. Abbasov bunu müvafiq sənədlərin tam hazır olmaması ilə əlaqələndirib.
Cəbhəyanı və sərhəd yaşayış məntəqələrində vəhşi heyvanların çoxalması və onların əhaliyə vurduğu zərərə gəlincə, nazir deyib ki, bunun qarşısını birmənalı şəkildə almaq mümkün deyil: «Kənd Təsərrüfatı Nazirliyi yanında Dövlət Baytarlıq Xidmətinin yerlərdəki qurumları həmin ərazilərdə baş verən belə halları nəzarətdə saxlayır. Ev və çöl heyvanları arasında quduzluq və digər yoluxucu xəstəliklərin yayılmamasına xüsusilə diqqət yetirirlər».