Sosial

Ana səhifə

Sosial

Azərbaycanda qaçqın və məcburi köçkünlərin məskunlaşması və sosial problemlərinin həlli üçün 310 milyon manat xərclənəcək

09 aprel 2010 10:16 (UTC +04:00)

APA-nın məlumatına görə, bu barədə Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov aprelin 9-da keçirdiyi mətbuat konfransında deyib. Ə. Həsənov bildirib ki, bu vəsaitin 203 milyonu dövlət büdcəsindən, 80 milyonu Dövlət Neft Fondundan, 27 milyonu isə beynəlxalq təşkilatlar tərəfindən ayrılacaq.

Komitə sədri 2009-cu ildə məcburi köçkünlərin və qaçqınların sosial şəraitinin yaxşılaşdırılması tədbirlərinə 310 milyon manat vəsait sərf olunduğunu, bunun 193 milyonunun dövlət büdcəsinin, 90 milyonunun Neft Fondunun, 27 milyonunun isə beynəlxalq humanitar təşkilatların payına düşdüyüqü söyləyib.

Ə. Həsənov onu da əlavə edib ki, ötən il ümumilikdə 1416 ailə – 7 min nəfər yeni mənzillərə köçürülüb. Məcburi köçkünlər üçün 87 min kvadratmetr mənzil sahəsi, 4 məktəb və digər sosial infrastrukturlar tikilərək istifadəyə verilib. Komitə tərəfindən 50 binada təmir işləri aparılıb, əlavə olaraq Ahıska türkləri üçün fərdi qaydada 49 mənzil tiklib.

Ötən il Dünya Bankının krediti hesabına məcburi köçkünləri əhatə edən 1,3 milyon dollar həcmində 31 mikrolayihə həyata keçirilib. 18 min məcburi köçkün bu layihələrdən bəhrələnib, 2200 nəfərə isə mikrokreditlər verilib ki bu da 1,5 milyon dollar dəyərindədir.

Ə. Həsənov bu il İmişli, Şəki, Ağcabədi, Yevlax, Mingəçevir və digər rayonlarda məcburi köçkünlər üçün mənzillərin inşa olunacağını da bəyan edib. Komitə rəhbərinin sözlərinə görə, Bakı şəhərinin Ramana qəsəbəsində beşmərtəbəli 70 mənzilli bina hazırdır və yaxın günlərdə ora köçürmə başlanacaq: “Goranboyda da 3 ədəd beşmərtəbəli bina tikilir və yaxın 2-3 aya işlər başa çatdırılacaq. Bu binalara Naftalandakı müxtəlif sanatoriyalardan məcburi köçkünlər yerləşdiriləcək. Yevlaxda 612 ailə üçün 10 ədəd beşmərtəbəli binanın tikintisi nəzərdə tutulur və bura həm Aran fin qəsəbəsindən, həm də digər yaşayış massivlərindən köçkünlər köçürüləcək. Ağdam rayonunda da 689 ailənin köçürülməsi üçün torpaq sahəsi götürülüb və tikinti üçün vəsait ayrılıb”.

qaçqın_köçkün