Sosial

Ana səhifə

Sosial

Azərbaycanda büdcədən maliyyələşdirilən müəssisələrdə çalışmış və hazırda işlə təmin olunmamış 3 700 məcburi köçkün var

09 aprel 2010 11:22 (UTC +04:00)

Bakı. Rəşad Süleymanov – APA-Economics. Azərbaycanda dövlət büdcəsindən maliyyələşdirilən müəssisələrdə, təşkilatlarda çalışmış, özlərindən asılı olmayan səbəblərə görə iş yerindən məhrum olmuş və işlə təmin olunmamış məcburi köçkünlərin sayı 3 700-ə yaxındır. «APA-Economics»in məlumatına görə, bunu baş nazirin müavini, Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov bildirib.

Ə.Həsənovun sözlərinə görə, Nazirlər Kabinetinin qərarı ilə bu şəxslərə orta aylıq əməkhaqqı (indeksasiya olunmuş) verilir.

«Bəzi şəxslər çox zaman heç harda işləmədən, evində oturub bu pulu almaq istəyir. Biz məcbur etmirik, amma onlara iş yerləri təklif edirik ki, çalışsınlar. Bəziləri iş tapıb çalışır, bəziləri isə bunu istəmir», - deyə Ə.Həsənov vurğulayıb.

Qeyd edək ki, Nazirlər Kabineti iki gün əvvəl «Büdcədən maliyyələşdirilən müəssisələrdə, təşkilatlarda çalışmış və özlərindən asılı olmayaraq iş yerindən məhrum olmuş məcburi köçkünlərin həyat şəraitinin yaxşılaşdırılması tədbirləri haqqında» 1994-cü il 10 may tarixli qərarının 2-ci bəndinin müddətini 2011-ci il yanvarın 1-dək uzadıb. Hökumət həmçinin Təhsil, Səhiyyə, Mədəniyyət və Turizm nazirliklərinə, digər aidiyyəti dövlət orqanlarına və əraziləri işğal olunmuş rayonların icra hakimiyyətlərinə tabeliyində olan qurumlarda müvafiq boş iş yerlərinə məcburi köçkünlərin işə qəbulu ilə bağlı müvafiq tədbirlər görməyi tapşırıb. Əmək və Əhalinin Sosial Müdafiəsi Nazirliyinə məşğulluq xidməti orqanlarına müraciət etmiş məcburi köçkünlərin məşğulluğu ilə bağlı qanunvericiliklə müəyyən olunmuş qaydada müvafiq tədbirlərin həyata keçirilməsini təmin etmək tapşırığı verilib.