Sosial

Ana səhifə

Sosial

Sumqayıtda “Ekologiya və ətraf mühitin qorunması” mövzusunda sərgi-müsabiqə keçiriləcək

09 aprel 2010 12:59 (UTC +04:00)

Sumqayıt – APA. 20 aprel 2010-cu il tarixdə Sumqayıt Dövlət Rəsm Qalereyasında “Gələcək əlimizdədir” I Şəhər Ekoloji Forumu çərçivəsində “Ekologiya və ətraf mühitin qorunması” mövzusunda sərgi-müsabiqə keçiriləcək.

APA-nın məlumatına görə, Müsabiqə şəhər Təhsil Şöbəsi tərəfindən 3 yaş qrupu (I qrup – 1-4-cü sinif şagirdləri, 6-12 yaş, II qrup – 5-7-ci sinif şagirdləri, 12-14 yaş, III qrup – 8-11-ci sinif şagirdləri, 15-17 yaş) üzrə təşkil ediləcək. Müsabiqənin sonunda qalib işlərdən ibarət masaüstü ekoloji təqvim hazırlanması nəzərdə tutulub.

I Şəhər Ekoloji Forumun məqsədi ekologiya və təbiətin mühafizəsi sahəsində müxtəlif təşkilatlar arasında təcrübə mübadiləsi, əməkdaşlığın inkişafı və gücləndirilməsi, şəhərin ekoloji problemlərinə geniş ictimaiyyətin diqqətini cəlb etmək, bu sahədə vətəndaş məsuliyyəti və təşəbbüskarlığını artırmaqdır.

Forumun vəzifələri gənc nəslin yaradıcılıq qabiliyyətinin inkişafı, ekologiya sahəsində onların bilik səviyyəsinin artırılması üçün müxtəlif müsabiqələrin təşkili, məktəblilərin ekoloji sahədə maarifləndirilməsi, onlarda ekoloji mədəniyyəti artırmaq, tarixi, mədəni, təbii miras və ümumbəşər dəyərlərinə gənc nəslin qayğı və hörmətinin artırılması, şəhərin bəzi ekoloji problemlərinin həllinə gənc nəsli cəlb etmək və məişət tullantılarının təhlükəsiz istifadəsi ilə bağlı məktəblilərin biliklərinin artırılmasından ibarətdir.