Sosial

Ana səhifə

Sosial

Çernobıl qəzasının aradan qaldırılmasında iştirak edən azərbaycanlıların 2 min nəfəri dünyasını dəyişib

21 aprel 2010 10:52 (UTC +04:00)

Bakı. Elnur Məmmədli – APA. Azərbaycan Çernobıl Əlilləri İttifaqının təşkilatçılığı ilə Çernobıl faciəsinin 20-ci ildönümü ilə bağlı tədbir keçirilib. APA-nın məlumatına görə, tədbirdə faciədən zərər çəkmiş azərbaycanlılar iştirak edib. Rəşid Behbudov adına Mahnı Teatrında keçirilən tədbirdə çıxış edən ittifaqın sədri Mirhəsən Həsənov bildirib ki, Çernobl faciəsi bəşəriyyət üçün ən dəhşətli faciə idi. Onun sözlərinə görə, 1986-cı ilin aprelin 26-da baş vermiş faciənin aradan qaldırılmasına ümumilikdə 600 min nəfər cəlb edilib. Bu prosesdə Azərbaycandan 7 min nəfər iştirak edib: «1990-cı ilə qədər qəzanın nəticələri tam şəkildə məxfiləşdirilib və həmin il qəza nəticələrinin aradan qaldırılması başa çatdı. O insanların qəza yerində aldıqları radiasiya ilə bağlı məlumatlar tam şəkildə məxfiləşdirildiyi üçün onların sosial, tibbi məsələləri ilə bağlı heç bir iş görülmədi və bu da faciələrə gətirib çıxardı. 1990-cı ildə Sovet İttifaqında qəzadan əziyyət çəkənlərin aclıq aksiyası keçirməsi məsələyə hüquqi qiymət verilməsi ilə nəticələndi. O zaman çətinliklərlə Nazirlər Soveti qəzadan zərər çəkənlərin sosial hüquqlarının müdafiəsi ilə bağlı qərar verdi».

M. Həsənov bildirib ki, Çernobıl qəzasının aradan qaldırılması prosesində iştirak edən Azərbaycanlıların artıq 2 min nəfəri dünyasını dəyişib: «Onların demək olar ki, böyük əksəriyyəti 25-35 yaşlarında olub. Son illərdə bu insanlar arasında ölüm halları daha da artıb. Onlarda xüsusilə qan xəstəlikləri, xərçəng, qaraciyər sirrozu kimi xəstəliklər yaranıb”.