Sosial

Ana səhifə

Sosial

Bu il Azərbaycanda fərdi uçot sistemində şəxsi hesabı olan sığortaolunanların sayı 6% artıb

01 iyul 2010 09:51 (UTC +04:00)

Bakı. Rəşad Süleymanov – APA-Economics. Cari ilin yanvar-iyun aylarında Azərbaycan Dövlət Sosial Müdafiə Fondunun (DSMF) fərdi uçot sistemində şəxsi hesabı olan sığortaolunanların sayı 5,6% artıb. Bu barədə «APA-Economics»ə DSMF-nin ictimaiyyətlə əlaqələr şöbəsindən məlumat verilib.

Hesabat dövründə DSMF tərəfindən 92 286 vətəndaşa fərdi şəxsi hesab açılıb. Nəticədə 1 iyul tarixinə Azərbaycanda fərdi şəxsi hesabı olan sığortaolunanların sayı 1 732 215 nəfərə catıb. DSMF-nin fərdi uçot sistemində fərdi şəxsi hesabı olan sığortaolunanların 956 293 nəfəri kişi, 775 922 nəfəri isə qadındır. Fərdi şəxsi hesabı olanlar arasında 40-50 yaş aralığında sığortaolunanlar üstünlük təşkil edir. Göstərilən yaş kateqoriyalarına aid olan vətəndaşlar ümumi sığortaolunanların 460 989 nəfərini əhatə edir. Bundan başqa, fərdi uçot sistemində 30 yaşa kimi sığortaolunan vətəndaşlar 402 477 nəfər, 30-40 yaşa kimi sığortaolunanlar 386 789 nəfər, 50-60 yaşa kimi sığortaolunanlar 339 697 nəfər, 60 yaşdan yuxarı olan sığortaolunanlar isə 142 263 nəfərdir.

Qeyd edək ki, fərdi uçot Azərbaycan qanunvericiliyinə uyğun əmək pensiyalarının və digər sosial müdafiə hüquqlarının təmin edilməsi üçün hər bir sığortaolunan haqqında məlumatların uçotunun təşkili və aparılmasıdır. “Əmək pensiyaları haqqında” qanuna əsasən, əmək pensiyaları fərdi hesaba toplanan pensiya kapitalına əsasən hesablanır.