Sosial

Ana səhifə

Sosial

Qafqaz Universitetində “Yüksələn təhsilimizin bayraqdarı - Azərbaycan məktəblisi” adlı mərasim keçirilib

16 oktyabr 2010 15:25 (UTC +04:00)

Bakı. Ramil Məmmədli - APA. Bu gün Qafqaz Universitetində 2010-2011-ci dərs ilinə həsr edilən “Yüksələn təhsilimizin bayraqdarı - Azərbaycan məktəblisi” adlı mərasim keçirilib.

APA-nın məlumatına görə, mərasimdə “Çağ” Öyrətim İşlətmələri İdarə Heyətinin sədri Enver Özeren Azərbaycanda təhsilin inkişafı barədə danışıb. O deyib ki, ölkədəki sabitlik Azərbaycan təhsilinin inkişafına səbəb olan amillərdən biri olub.

Sonra tədbirdə “Çağ” Öyrətim İşlətmələrinin “Araz” kurslarını bitirərək 600-700 balla ali məktəblərə daxil olan abituriyentlərə və 2010-cu ildə keçirilən beynəlxalq fənn olimpiadalarında qalib gələn Qafqaz Universitetinin tələbələrinə mükafatlar təqdim edilib. Mükafatlar və xatirə hədiyyələrini qaliblərə təhsil naziri Misir Mərdanov, Azərbaycan Könüllü Hərbi Vətənpərvərlik Texniki İdman Cəmiyyəti Respublika Şurasının (KHVTİC) sədri, general-mayor Novruzəli Orucov, Ombudsman Elmira Süleymanova, Milli Məclisin deputatı Cəmil Həsənli, “Çağ” Öyrətim İşlətmələri İdarə Heyətinin sədri Enver Özeren və digər şəxslər təltif ediblər.

Mərasimdə qalibləri təbrik edən təhsil naziri Misir Mərdanov deyib ki, “Çağ” Öyrətim İşlətmələri Azərbaycanda fəaliyyət göstərdiyi 18 il müddətində təqdir olunacaq uğurlara imza atıb. Təhsil naziri qurumun rəhbərliyinin uğurların əldə edilməsində əməyini də yüksək qiymətləndirib və Azərbaycan hökuməti adından təşəkkür edib.