Sosial

Ana səhifə

Sosial

Azərbaycanda 127 634 ailə ünvanlı dövlət sosial yardımı alır

27 oktyabr 2010 12:44 (UTC +04:00)

Bakı. İlhamə İsabalayeva-APA. Bu ilin yanvar-sentyabr ayları ərzində Azərbaycanda
127 634 ailə ünvanlı dövlət sosial yardımı alıb. Nazirliyin mətbuat xidmətindən APA-ya verilən məlumata görə, həmin ailələrin hər birinə ayda orta hesabla 108,38 manat ünvanlı yardım ödənilib. Bir ailə üzvünə isə 23,96 manat ünvanlı dövlət sosial yardım düşüb. Yardım alanların 41,1 faizi 3 və daha çox uşaq olan ailələrdir.
Hesabat müddətində əlil və şəhid ailələri üçün Gəncə, Lənkəran və Quba şəhərlərində 36, Cəlilabad rayonunda 16 və 36, Gədəbəy rayonunda 16, Bakı şəhərinin Qaradağ rayonunda 81 mənzilli yaşayış binalarının inşası tam başa çatdırılaraq istismara hazır vəziyyətə gətirilib. Bu günlərdə isə Lerik və Neftçalada 16, Balakən şəhərində isə 36 mənzilli yaşayış binaları əlil və şəhid ailələrinin istifadəsinə verilib. Eyni zamanda, İsmayıllıda 36, Bakı şəhərinin Yasamal və Sabunçu rayonlarında 81 mənzilli yaşayış binasının tikintisi davam etdirilir. Gəncə şəhərində 36 mənzilli, Bakı şəhərinin Xəzər rayonunda isə 81 mənzilli yaşayış binalarının tikintisi başa çatıb və istismara verilmək üçün son tamamlanma işləri aparılır. Bundan başqa, 200 fərdi yaşayış evinin 147-də tikinti quraşdırma işləri başa çatmaq üzrədir, 53-də isə tikinti quraşdırma işləri davam etdirilir. Ümumilikdə indiyədək 3 500-dən artıq əlil və şəhid ailəsi dövlət hesabına mənzillə təmin olunub.
Bu ilin ilk 9 ayında əlil və şəhid ailələrinə 40 minik avtomobili verilib. İndiyə qədər 2 900-dən çox əlil dövlət hesabına minik avtomobili ilə təmin edilib.