Sosial

Ana səhifə

Sosial

Azərbaycan pensiyaların baza hissəsinə görə MDB məkanında ikinci yeri tutur

29 oktyabr 2010 11:47 (UTC +04:00)

Bakı. İlhamə İsabalayeva-APA. “Bakıda saxta əmək haqqı ilə pensiya alanların demək olar ki, 95 faizinin ödənişini ləğv etdik. Onlar hazırda da qanunsuz ödənilən vəsaitləri geri qaytarırlar”. APA-nın məlumatına görə, bu fikirləri Dövlət Sosial Müdafiəsi Fondunun sədri Səlim Müslümov bu gün keçirdiyi mətbuat konfransında bildirib. Onun sözlərinə görə, ölkə üzrə pensiyanın orta məbləği 111 manat olduğu halda, yeni təyin olunan pensiyalar üzrə orta aylıq məbləğ 162 manat olub. Hazırda Azərbaycanda pensiyanın baza hissəsi 106 ABŞ dollarıdır ki, bu göstəriciyə görə də Azərbaycan MDB məkanında ikinci yeri tutur.

Fond sədrinin sözlərinə görə, hazırda kənddə yaşayan pensiyaçıların 97,6 faizi, şəhərdə yaşayan pensiyaçıların 100 faizi pensiyasını kartla alır. Hazırda 1 milyon 287 min nəfər əmək pensiyası alır. Onların 512 min nəfəri kişi, 775 min nəfəri qadındır. Ümumilikdə əmək pensiyaçılarının 133 min nəfəri işləyən pensiyaçılardır. Fond sədri deyib ki, bu gündən oktyabr ayı üçün pensiyaların maliyyələşdirilməsi də başa çatır. Ümumilikdə oktyabrda pensiya və müavinətlərin maliyyələşdirilməsi üçün 146,5 milyon manat vəsait tələb olunub.

Səlim Müslümov bu gün kartların pensiyaçılara çatdırılması ilə bağlı problemlərin olduğunu da deyib. O belə hesab edir ki, kartların pensiyaçılara çatdırılmasında özəl model hazırlamaq lazımdır.

Səlim Müslümov DSMF-nin fəaliyyəti üçün problem yaradan digər məsələyə də toxunub: “Bu gün fondun müşahidə missiyası yoxdur. Məsələn, hansısa bir tikili aparanda fond gedib orada işçilərin əmək müqavilələri ilə bağlı vəziyyəti öyrənə bilmir. Mənə elə gəlir ki, bir sığorta təşkilatı kimi fonda belə səlahiyyətləri vermək vacibdir”.