Sosial

Ana səhifə

Sosial

Azərbaycanda orta pensiyanın məbləği orta aylıq əmək haqqının 35%-ni təşkil edir

22 noyabr 2010 08:00 (UTC +04:00)

Bakı. Nicat Mustafayev – APA-Economics. Bu ilin ilk doqquz ayı ərzində Azərbaycanda təyin olunmuş aylıq pensiyaların orta məbləği ötən ilin müvafiq dövrü ilə müqayisədə 11,4% artaraq 111,3 manat olub və orta aylıq əmək haqqının 35%-ni təşkil edib.

Dövlət Statistika Komitəsindən «APA-Economics»ə verilən məlumata görə, oktyabr ayının 1-i vəziyyətinə Azərbaycanda qeydiyyatda olan 1 289,8 min nəfər pensiyaçının 65%-i yaşa görə, 25%-i əlilliyə görə, 10%-i isə ailə başçısının itirilməsinə görə pensiya alıb. Pensiyaçıların ümumi sayından 0,7%-ni cari ilin doqquz ayı ərzində ilk dəfə qeydiyyata alınaraq pensiya təyin olunmuş şəxslər təşkil edib.

Bundan başqa, cari ilin 9 ayı ərzində pensiya və müavinətlərin maliyyələşdirilməsinə 1 226,8 mln. manat vəsait yönəldilib ki, bu da keçən ilin müvafiq dövrünə nisbətən 57,2 mln. manat və ya 4,9% çoxdur. Vəsaitin 1 192,3 mln. manatını əhaliyə ödənilən pensiya, 34,5 mln. manatını isə müavinət xərcləri təşkil edib. Müavinətlərin 12,7 mln. manatı hamiləliyə və doğuma görə, 10,1 mln. manatı əmək qabiliyyətinin müvəqqəti itirilməsinə görə, 6,5 mln. manatı dəfn üçün, 5,2 mln. manatı isə digər ödəmələrin payına düşüb.

Eyni zamanda, cari ilin oktyabr ayının 1-i vəziyyətinə ölkədə 294,9 min nəfər sosial müavinət alıb. Yaşa görə müavinət alanların sayı 17,5 min nəfər, əlilliyə görə - 95,3 min nəfər, ailə başçısının itirilməsinə görə - 34,5 min nəfər, sağlamlıq imkanları məhdud olduğuna görə müavinət alan 18 yaşadək uşaqların sayı isə 58 min nəfər təşkil edib.

Əmək pensiyasını almaq hüququ olmayan 56,4 min nəfərə kommunal, nəqliyyat və digər xidmətlərə görə güzəştlərin əvəzinə müavinət, əmək xəsarəti və ya peşə xəstəliyi nəticəsində 557 nəfər zərərçəkənlərə, yetim və valideyn himayəsindən məhrum olmuş uşaqların 803 nəfər qəyyumlarına, eləcə də 10,8 min ailəyə 21 min nəfər uşaq üçün müavinət verilib. Bu müavinətləri şəhid ailələrinin, müharibə əlillərinin, I və II qrup Çernobıl AES əlillərinin və müddətli hərbi xidmət qulluqçularının uşaqları alıb.

Bundan əlavə, 72,6 min nəfərə, o cümlədən 65,5 min nəfərə uşağın doğulmasına görə, 4,8 min nəfərə radiasiya qəzası nəticəsində əlil olmuş şəxslərin müalicəsi üçün, penitensiar xidmətdən azad olan 823 nəfərə və həyatını itirmiş 1 508 nəfərin dəfni üçün birdəfəlik müavinət verilib.

Bununla yanaşı, hesabat dövründə Azərbaycan qarşısında göstərdiyi xüsusi xidmətlərə görə 33,5 min nəfər 3,7 mln. manat məbləğində aylıq təqaüd alıb.

Cari il oktyabr ayının 1-i vəziyyətinə ölkədə 128 min ailənin 577,4 min nəfər üzvü ünvanlı dövlət sosial yardımı alıb ki, onların 293,6 min nəfərini qadınlar, 294,7 min nəfərini isə uşaqlar təşkil edib. Ünvanlı dövlət sosial yardımının 1 nəfərə düşən orta aylıq məbləği 23,96 manat təşkil edib.