Sosial

Ana səhifə

Sosial

Gəncədə “Kadastr və daşınmaz əmlakın qeydiyyatı” layihəsinin icrasına başlanılması ilə bağlı təqdimat keçirilib

11 yanvar 2011 22:31 (UTC +04:00)

Gəncə. Ayxan Hüseynov-APA Gəncədə yerləşən Ramada Plaza Otelində Əmlak Məsələləri Dövlət Komitəsinin Almaniyanın KFV Bankının və GFA/GCİ Consortium məsləhətçi şirkətinin birgə iştirakı ilə “Kadastr və daşınmaz əmlakın qeydiyyatı” layihəsinin icrasına başlanılması ilə bağlı təqdimat keçirilib. APA-nın Qərb bürosunun verdiyi məlumata görə, layihənin başlıca məqsədi Gəncə və Şəki şəhərlərində daşınmaz əmlaka dair hüquqların dövlət qeydiyyatı və kadastrı sisteminin daha da inkişaf etdirilməsi, daşınmaz əmlak üzərində hüquqların qeydiyyatı ilə bağlı xidmətlərin səviyyəsinin yüksəldilməsi və çevikliyin daha da artırılmasıdır. Layihə çərçivəsində həmçinin Gəncə və Şəki şəhərlərində daşınmaz əmlak obyektlərindən səmərəli istifadə edilməsi ilə bağlı mükəmməl rəqəmsal kadastr xəritələri yaradılacaqdır.
Layihənin iki mərhələdə həyata keçirilməsi nəzərdə tutulur. İlkin mərhələ məsləhət xidmətlərinin göstərilməsindən ibarətdir. Daşınmaz əmlakın qeydiyyatı və kadastrı layihəsinə beynəlxalq məsləhətçi cəlb etməklə bağlı KFV Bankı tərəfindən keçirilmiş tenderin qalib GFA/GCİ Consortium məsləhətçi şirkəti olub. Beynəlxalq məsləhətçinin fəaliyyətinə dair iş planı artıq Ə.M.D.K-ə təqdim olunub.
Ə.M.D.K-nin Daşınmaz Əmlak Kadastrı və texniki inventarlaşdırma Mərkəzinin direktoru Ramiz Quliyev jurnalistlərə açıqlamasında mövcud olan bütün daşınmaz əmlak obyektlərinin vahid dövlət kadastrının tərtibi işlərinə 2009-cu ilin iyun ayından başlandığını bildirib; “Bu işlərin yeni müstəvidə müasir şəkildə qurulması üçün dünya təcrübəsinin öyrənilməsinə ehtiyac var. Bu baxımdan Ə.M.D.K-i və onun qurumu olan Daşınmaz Əmlak Kadastrı və texniki inventarlaşdırma mərkəzi bu günləri bir sıra beynəlxalq layihələrin icrasında iştirak edir. Belə layihələrdən biridə bu gün təqdimatı keçirilən Azərbaycan və Almaniya hökumətləri arasında bağlanan saziş əsasında həyata keçirilən “Kadastr və daşınmaz əmlakın qeydiyyatı” layihəsidir. Bu layihəni həyata keçirtməkdə əsas məqsəd bilavasitə Gəncə şəhərində və Şəki rayonunun kənd yerlərində mövcud olan daşınmaz əmlak obyektlərinin, o cümlədən torpaq paylarının daşınmaz əmlak kadastrını yaratmaqdan və eyni zamanda həmin daşınmaz əmlak obyektlərinin üzərində mövcud olan hüquqların dövlət qeydiyyatının şəffaflığını təmin edəcək sistemin yaradılmasından ibarətdir”.
Jurnalistlərin suallarını cavablandıran GFA/GCİ Consortium məsləhətçi şirkətinin rəhbəri Konrad Hoyos təqdimatı keçirilən layihə haqda açıqlama verib: “Məlum olduğu kimi Almaniyada artıq 150 ildən artıqdır ki, daşınmaz əmlakın kadastrı və qeydiyyatı işinin təşkil olunur və alman vətəndaşları bizim qurduğumuz bu sistemdən böyük fayda əldə edirlər. Növbəti 9 ay ərzində biz Almaniyada qurduğumuz sistemi Azərbaycanda da tətbiq edəcəyik və bunun üçün biz Azərbaycanlı mütəxəssislərin köməyindən istifadə edəcəyik ”.
Qeyd edək ki, layihənin həyata keçirilməsi nəticəsində daşınmaz əmlakın dövlət qeydiyyatı ilə bağlı mövcud proseduraların sadələşdirilməsi, qeydiyyata sərf olunan vaxt itkisinin aradan qaldırılması, bu sahədə əhaliyə göstərilən xidmət səviyyəsinin və operativliyin daha da artırılmasına nail olunacaqdır.