Sosial

Ana səhifə

Sosial

Hacıbala Abutalıbov: “Dövlət vətəndaşların köçürülməsinə ümumilikdə 73 milyon manat ayırdığı halda, Leyla Yunusun iddia etdiyi kimi, hansı 900 milyon manatın yeyintisindən söhbət gedə bilər?” - MÜSAHİBƏ

04 sentyabr 2011 13:01 (UTC +04:00)

- Füzuli meydanı yaxınlığında yeni park-bağ kompleksinin tikintisi hansı layihə əsasında həyata keçirilir və hansı küçələri əhatə edir?

- Azərbaycan SSR Nazirlər Sovetinin 18 may 1987-ci il tarixli, 182 saylı qərarı ilə təsdiq edilmiş və hal-hazırda qüvvədə olan Bakı Şəhərinin Baş Planına uyğun olaraq, Bakı şəhərində aparılan abadlıq və yenidənqurma işlərinin tərkib hissəsi olan yeni park-bağ kompleksinin salınması məqsədilə ayrılan sahə Füzuli, Səməd Vurğun, Şəmsi Bədəlbəyli, Mirzağa Əliyev, Rəsul Rza, Şamil Əzizbəyov, Süleyman Rəhimov, İslam Səfərli, Təbriz Xəlil Rza oğlu və Mirzə İbrahimov küçələrinin əhatəsində olan ərazini əhatə edir. Artıq orada mövcud olan yaşayış və qeyri-yaşayış sahələrinin köçürülməsi işləri 2008-ci ildən həyata keçirilir.

- Adıçəkilən ərazidə vətəndaşların mülkiyyət hüququ nə dərəcədə qorunur və hansı məbləğdə kompensasiya ödənilir?

- Biz vətəndaşlarımızın mülkiyyət hüququna hörmətlə yanaşırıq. Həmin ərazidə köçürülmə işləri mövcud qanunvericiliyə əsasən vətəndaşların müvafiq təsdiqedici sənədləri əsasında istifadəsində olan yaşayış və qeyri-yaşayış sahələrinin hər kvadrat metri üçün Maliyyə Nazirliyi və Əmlak Məsələləri üzrə Dövlət Komitəsi tərəfindən həmin ərazidə yerləşən yaşayış və qeyri-yaşayış sahələrinin qiymətləndirilməsi ilə bağlı qəbul edilmiş qərara uyğun olaraq 1500 manat məbləğində vəsait ödənilməsi notarial qaydada bağlanmış alğı-satqı müqaviləsi əsasında Bakı Şəhər İcra Hakimiyyəti tərəfindən dövlət büdcəsindən bu məqsədlər üçün ayrılmış ümumilikdə 73 milyon manat vəsait hesabına həyata keçirilir.

- Ş. Bədəlbəyli küçəsi, ev 38-in mülkiyyət sahibi Leyla Yunusun həyat yoldaşı Arif Yunusova mülkiyyətində olan mənzildən çıxmaq üçün kifayət qədər vaxt verilmişdimi?

- Bəli, ərazidə söküntü işləri aparılacağı ilə bağlı vətəndaş Arif Seydulla oğlu Yunusovun mülkiyyətində olan, söküntü ərazisinə düşən Ş.Bədəlbəyli küçəsi ev 38, 1 və 2 saylı mənzillərin notarial qaydada alğı-satqısının həyata keçirilməsi üçün tərəfimizdən bu illər ərzində dəfələrlə mənzillərə dair mülkiyyət hüququnu təsdiq edən sənədlərin təqdim edilməsi barədə edilən xahişlərimizə baxmayaraq, müvafiq sənədlər bu günədək adıçəkilən vətəndaş tərəfindən təqdim edilməyib. Bununla yanaşı, Bakı Şəhər İcra Hakimiyyəti tərəfindən mənzillərə dair mülkiyyət hüququnu təsdiq edən sənədlərin təqdim edilməsi barədə vətəndaşın qeydiyyatda olduğu Nizami küçəsi ev 53, mənzil 30 ünvanına, eyni zamanda onun [email protected] elektron poçt ünvanına göndərilmiş müraciətlər də cavabsız qalıb. Vətəndaşa dəfələrlə edilən xəbərdarlıqdan sonra, Bakı Şəhər İcra Hakimiyyətinin başçısı olaraq şəxsən mənim tərəfimdən mülkiyyət sahibi Arif Seydulla oğlu Yunusovun həyat yoldaşı Leyla Yunus qəbul edilərək, park-bağ kompleksinin yaradılması ilə əlaqədar Bakı Şəhərinin Baş Planına uyğun olaraq, onlara məxsus sahənin də sökülmə ərazisinə düşdüyü bildirilib və dövlət tərəfindən qanuna müvafiq qaydada kompensasiyanın ödənilməsi üçün mülkiyyət sənədlərinin köçürmə komissiyasına təqdim olunması tövsiyə edilsə də, vətəndaş nəinki buna əməl etməyib, həmin sahənin söküləcəyi təqdirdə beynəlxalq təşkilatlara və məhkəmə orqanlarına müraciət edəcəyini bildirib. 3 ay öncə tərəfimizdən təmin olunmuş nəqliyyat vasitələri ilə Arif Seydulla oğlu Yunusov tərəfindən ona məxsus olan həmin ünvanda mövcud olan bütün avadanlıqlar tam təhlükəsiz şəraitdə, əşyalara heç bir zərər vurulmadan ərazidən daşınıb.

Qeyd etmək vacibdir ki, köçürmə işləri başlanan andan etibarən yüzlərlə Azərbaycan Respublikası və xarici ölkələrin vətəndaşları onlara məxsus olan mənzillərə dair mülkiyyət hüququnu təsdiq edən dövlət sənədlərini dövlət notariusuna təqdim edərək, qanunvericiliyə uyğun şəkildə notarial qaydada vətəndaşlarla bağlanmış alğı-satqı müqavilələri əsasında mənzillərin hər kvadrat metr sahəsi üçün 1500 manat məbləğində vəsait tərəfimizdən dövlət notariusunun depozit hesabına ödənilməklə, alğı-satqı müqaviləsi imzalandıqdan sonra onlara kompensasiya məbləğini dövlət notariusunun qəbzi əsasında “Texnikabank” ASC-dən şəxsən mülkiyyət sahibi tərəfindən əldə etməsi yolu ilə həmin vətəndaşların köçürülməsi təmin edilib. Arif Yunusov da digər köçürülmüş vətəndaşlar kimi yuxarıda göstərilən qaydada müvafiq sənədləri təqdim etdikdən və onunla notarial qaydada alqı-satqı müqaviləsi bağlandıqdan sonra ona ödəniləcək kompensasiyanı “Texnikabank” ASC-dən əldə edə bilər.

- Leyla Yunus köçürülmə komissiyasını korrupsiyada ittiham edərək doqquz yüz milyon manat yeyinti olduğunu bildirir...

- Əgər Heydər Əliyev Sarayının arxasından Azərbaycan Dövlət Dram teatrına qədər olan Füzuli, Mirzağa Əliyev, Şəmsi Bədəlbəyli və digər küçələri əhatə edən ərazidən vətəndaşlara məxsus yaşayış və qeyri-yaşayış sahələrinin köçürülməsinə 73 milyon manat ayrılmış vəsait hesabına 1000 nəfərdən artıq vətəndaşla alğı-satqı həyata keçirilmişsə, dövlət tərəfindən ayrılmış kompensasiya məbləği Maliyyə Nazirliyi Dövlət Xəzinədarlıq Agentliyinin yerli xəzinədarlıq orqanı tərəfindən həmin vətəndaşların dövlət notariusunda açılmış depozit hesablarına ödənilməsi yolu ilə bu vətəndaşların həmin ərazidən köçürülməsi təmin edilmişdirsə dövlət büdcəsindən ayrılan 73 milyon manat vəsaitin müqabilində hansı 900 milyon manatın yeyintisindən söhbət gedə bilər? Eyni zamanda alğı-satqı proseduru həyata keçirildikdən sonra köçürülən vətəndaşların ev əşyalarının daşınması, yaşayış və qeyri-yaşayış sahələrinin sökülməsi və tullantıların daşınması işlərinə təmənnasız olaraq, iş adamları və özəl şirkətlərin yaxından köməklik göstərməsi, ayrı-ayrı vətəndaşlara və hüquqi şəxslərə məxsus mənzillərin və torpaq sahələrinin əvəzsiz olaraq dövlətə bağışlamaları nəticəsində dövlət büdcəsinin 15 milyon manata qədər vəsaitinə qənaət edilib.

Bir daha qeyd etmək istərdim ki, Leyla Yunus Bakı Şəhər İcra Hakimiyyətində qəbul edilərkən ona bildirilib ki, dövlət hər bir Azərbaycan vətəndaşının mülkiyyət hüququna hörmət və diqqətlə yanaşır və mövcud ərazilərdə həyata keçirilən köçürülmə prosesi Bakı şəhərinin Baş Planına uyğun olaraq, aparılan abadlıq və quruculuq, daha dəqiq desək, yeni park-bağ kompleksinin salınması işləri ilə əlaqədardır.

Köçürülmə prosesinin mahiyyətini və səbəblərini başa düşdüyünü, köçürməyə dövlət tərəfindən ümumilikdə 73 milyon manat ayrıldığı halda 900 milyon manat yeyintinin yalan və böhtan olduğunu etiraf edən Leyla Yunus onunla aparılan söhbətdən sonra razılığını bildirsə də, yenə də köhnə əməllərindən əl çəkməyib, xarici mətbuata, kütləvi informasiya vasitələrinə, internet saytlarına və beynəlxalq təşkilatlara qərəzli şəkildə yalan məlumat verərək, guya köçürmə siyasətində korrupsiya hallarının olduğunu, eləcə də insan haqlarının, o cümlədən, vətəndaşların mənzil hüquqlarının pozulduğunu bildirib. Məqsəd - beynəlxalq və yerli ictimai fikri çaşdırmaqla ona xaricdən ayrılan qrantların davam etməsini yenidən təmin etməkdir. Çünki belələrinin həyatda yeganə amal və məqsədi nə yolla olursa olsun, yeni gəlir mənbəyi əldə etməkdir. Təəssüf ki, antik dövrün filosofu Siseronun təbirincə desək, “Tarixdə yalan danışmağı, böhtan atıb şər əməllərlə məşğul olmağı özünə peşə seçən və bu peşədən zövq almağı bacaran insanlar az olmamışdır”. Yalanı, böhtanı hər şeydən üstün tutan və başlıca qayəsinə çevirən Leyla Yunus kimi insanlar üçün “nə qədər cəmiyyət üçün yaxşıdır, demək bizim üçün bir o qədər pisdir və ya cəmiyyət üçün nə qədər pisdir, demək bizim üçün o qədər yaxşıdır” prinsipi görünür çox əlverişlidir. Təsadüfi deyil ki, hələ 2600 il əvvəl böyük Çin filosofu Konfutsi Leyla Yunus kimi şəxsi maraqlarını milli, dövlət maraqlarından üstün tutan, öz xeyrindən ötrü torpağı, milləti, Vətəni də yalan və böhtanla tapdalayan adamların olduğuna işarə edərək yazırdı: “Məkrli insanların qəlbindəkiləri bilmək təbiəti dərk etməkdən də çətindir. İnsanın qəlbindəkilər dağlardan, çaylardan da qorxuludur. Çünki təbiətin yazı və payızı, qışı və yayı var “. Leyla Yunus kimi məkrli insanların qəlbində və sifətində isə nə yaz və payız, nə qış, nə də yay var.