Sosial

Ana səhifə

Sosial

Avropa Komissiyası tərəfindən maliyyələşdirilən Tvinninq layihəsinin təqdimatı keçirilib - FOTO

Avropa Komissiyası tərəfindən maliyyələşdirilən Tvinninq layihəsinin təqdimatı keçirilib - <font color=red>FOTO</font>

25 oktyabr 2011 10:07 (UTC +04:00)

Bakı. Ülkər Qasımova – APA. Azərbaycan Müəllif Hüquqları Agentliyinin benefisiarlığı ilə Avropa Qonşuluq Siyasəti çərçivəsində Avropa Komissiyası tərəfindən maliyyələşdirilən və icrasına başlanılan Tvinninq layihəsinin təqdimat mərasimi keçirilib. APA-nın məlumatına görə, tədbirdə Müəllif Hüquqları Agentliyinin sədri Kamran İmanov, mədəniyyət və turizm nazirinin müavini Sevda Məmmədliyeva, Azərbaycan Milli Elmlər Akademiyasının (AMEA) prezidenti Mahmud Kərimov, gənclər və idman nazirinin müavini İntiqam Babayev, Avropa İttifaqının Azərbaycandakı nümayəndəsi Roland Kobia, Yunanıstanın Azərbaycandakı səfiri Yannis Metaksas, Almaniyanın Azərbaycandakı səfiri Herbert Quelle və başqaları iştirak edib.

K. İmanov bildirib ki, layihənin əsas istiqamətləri müəlliflik hüququ və əlaqəli hüquqların təminatının gücləndirilməsi, piratçılığın səviyyəsinin azaldılmasına köməklik göstərilməsi və Müəllif Hüquqları Agentliyinin potensiallarının artırılmasından ibarətdir. Layihənin həyata keçirilməsi üçün bir ilə yaxın hazırlıq işləri aparılıb. İcrası ilə əlaqədar tender qaydasında Yunanıstanın Avropa İctimai Hüquq Mərkəzi, Almaniya Hüquqi Əməkdaşlıq Fondu və İspaniyanın İnzibati və İctimai Siyasət Beynəlxalq Fondunun daxil olduğu konsorsium yaradılıb.

K. İmanov çıxışında layihə çərçivəsində agentliyin nəzdində Əqli Mülkiyyət Hüquqlarının Təminatı Mərkəzi yaradıldığını diqqətə çatdırıb. Gələcəkdə mərkəzin agentliyin tabeliyində müstəqil qurum kimi fəaliyyət göstərməsi planlaşdırılır. Avropa Komissiyası tərəfindən agentlikdə hüquqların rəqəmli idarə olunması (DRM) üzrə online Lisenziyalaşdırma Mərkəzinin yaradılması üçün proqram təminatının əldə edilməsinə və bu sistemdə işləyəcək xüsusi xidmət personalının hazırlığına da yardım göstəriləcək.

Avropa İttifaqının Azərbaycandakı nümayəndəsi Roland Kobia bildirib ki, müəllif hüquqları texniki sahə olsa da, çox vacib bir sahədir. O, Azərbaycan mədəniyyətini qorumağın əhəmiyyətindən də söz açıb: “Azərbaycan mədəniyyətini qorumaq çox vacibdir. Çünki Azərbaycanın muğam sənəti, “Əli və Nino” kimi əsərləri qorumaq və sürətinin çıxarılmaması üçün gələcəkdə piratçılığa qarşı mübarizə aparmaq lazımdır. Hesab edirəm ki, bu layihə Azərbaycanın Avropa ölkələri ilə çox sıx əməkdaşlığını göstərir. Əsasən də Avropa ilə Azərbaycanın bu yöndə işbirliyinin davam etməsi vacib bir məsələdir”.

Yunanıstanın Azərbaycandakı səfiri Yannis Metaksas bu layihədə iştirak etməkdən məmnun olduqlarını söyləyib: “Biz qürur duyuruq ki, məhz bu, Yunanıstanın Azərbaycanda ilk tvinninq layihəsidir. Bu sahədə biliyimiz və təcrübəmiz çox böyükdür. Bu təcrübəni Azərbaycanla bölüşməkdən çox şad olarıq”.

Qeyd edək ki, 18 ay davam edəcək layihə çərçivəsində Yunanıstan, Almaniya, İspaniya, Fransa, Böyük Britaniya, İtaliya, Portuqaliya, Rumıniya, Macarıstan və Avropa İttifaqına üzv digər ölkələrdən ekspertlər Azərbaycana səfər edərək öz təcrübələrini bölüşəcəklər. Agentliyin və digər aidiyyəti dövlət qurumlarının nümayəndələrinin isə Yunanıstan, Almaniya, İspaniya, Portuqaliya və Rumıniyada təcrübə keçmələri nəzərdə tutulur.