Sosial

Ana səhifə

Sosial

Azərbaycan Gənclərinin VI Forumu başa çatıb

25 oktyabr 2011 13:03 (UTC +04:00)

APA-nın məlumatına görə, forumda gənclər və idman naziri Azad Rəhimov, Gənclər Təşkilatları Milli Şurasının sədri Fuad Muradov, “İrəli” İctimai Birliyinin sədri Ceyhun Osmanlı, YAP Gənclər Birliyinin sədri Seymur Orucov, Tələbə Gənclər Təşkilatları İttifaqının sədri Şahin İsmayılov və digərləri çıxış edib. Sonra forum öz işini plenar iclaslarla davam etdirib. Sonda VI forumun yekun sənədləri – qərar və qətnaməsi qəbul olunub.

Qətnamədə bildirilir ki, hesabat dövrü ərzində dövlət gənclər siyasətinin əsas sahələrində müsbət dəyişikliklər, yüksək inkişaf, dəyərli nəticələr əldə olunub, gənclərin vətənpərvərlik tərbiyəsi sahəsində davamlı iş aparılıb, yeni formalardan istifadə edilib. Qətnamədə “Azərbaycan gəncliyi 2011-2015-ci illərdə” dövlət proqramının tətbiq edilməsi yüksək qiymətləndirilib.

Forumda 11 bənddən ibarət qərar da qəbul olunub. Qərarda V forumdan ötən dövr ərzində gənclərlə iş sahəsində həyata keçirilən dövlət siyasəti müsbət qiymətləndirilib və dövlət orqanlarına tövsiyə olunub ki, “Azərbaycan gəncliyi 2011-2015-ci illərdə” dövlət proqramının əlaqələndirilməsi və istiqamətləndirilməsi həyata keçirilsin, gənclərin inkişafı və bu sahədə elmi-tədqiqat işlərinin aparılması stimullaşdırılsın.

Qərarda gənclərin yerli və mərkəzi səviyyədə idarəetmə vəzifələrinə cəlb edilməsi dövlət qurumlarına, ictimai və özəl təşkilatlara tövsiyə edilir, gənclər üçün təlim mərkəzlərinin yaradılması, müasir informasiya və kommunikasiya texnologiyalarının imkanlarından daha geniş istifadə üçün əlavə tədbirlərin görülməsi zəruri sayılır.

Forumun sonunda prezidenti İlham Əliyevə müraciət qəbul olunub.

Qeyd edək ki, Azərbaycan Gənclərinin ilk Forumu Heydər Əliyevin təşəbbüsü ilə 1996-cı il fevral ayının 2-də keçirilib. 1997-ci il fevralın 1-də forumun ildönümü münasibətilə bir qrup gənci qəbul edən Heydər Əliyev ilk forumun keçirildiyi 2 fevral tarixinin Azərbaycan Gəncləri Günü kimi qeyd olunması haqqında fərman imzalayıb.

Bu günə qədər Azərbaycan gənclərinin 5 forumu keçirilib.

gənc_forum