Sosial

Ana səhifə

Sosial

Nobel mükafatı laureatı Ada Yonat Bakıda keçirilən “Yaşıl texnologiyalar həftəsi”nin açılış mərasimində iştirak edib

12 dekabr 2011 09:33 (UTC +04:00)

Bakı. Ülkər Qasımova-APA. Bu gün Azərbaycanın mərhum dövlət başçısı Heydər Əliyevin xatirəsinə həsr olunmuş “Yaşıl texnologiyalar həftəsi”nin açılış mərasimi keçirilib. APA-nın məlumatına görə, tədbir Azərbaycanda BMT-nin İqtisadi və sosial Şurasının (ECOSOS) dəstəyi ilə fəaliyyət göstərən Dünya Gənclər Bankı Şəbəkəsinin regional ofisinin təşkilatçılığı ilə baş tutur.

Açılış mərasimində ilk dəfə olaraq Azərbaycana gələn Nobel mükafatçısı Ada Yonat iştirak edib. 2009-cu ildə Nobel mükafatı, 2006-cı ildə Volf mükafatı, 2008-ci ildə UNESCO-nun “Elmdə qadın” nominasiyasında “Loreal” mükafatına layiq görülən Ada Yonat “Yaşıl texnologiyalar həftəsi” çərçivəsində gənclərlə də görüşüb.

Azərbaycan haqqında fikirlərini də bölüşən Ada Yonat, səfər müddətinin yalnız bir gündən ibarət olduğunu diqqətə çatdırıb: “Hava limanından otelə gələnə kimi şəhərdə gördüyüm mənzərə məndə gözəl təəssüratlar oyatdı. İlk dəfə gəlməyimə baxmayaraq, bu ölkə haqqında dostlarımdan çox şeylər eşitmişdim. Hətta mənə Nobel qardaşlarının buradakı muzeyinə getməyi məsləhət gördülər, amma vaxt azlığından ora növbəti səfərlərim çərçivəsində getməyi düşünürəm. Proqramım çox geniş olduğu üçün 24 saat şəhərinizin qonağı olacağam. Bu müddət ərzində əsas məqsədim fikirlərimi gənclərə bölüşmək və onları maraqlandıran mövzular ətrafında danışmaqdır”.

Ada Yonat Azərbaycanın tanınmış alimləri barədə məlumatının olduğunu qeyd edib. Qonaq azərbaycanlıların pozitiv insanlar olduğunu da xüsusi qeyd edib: “Mən hansısa bir ölkədə Nobel mükafatına layiq olan şəxslərin adını çəkə bilmərəm. Eləcə də Azərbaycanda bu mükafata kimlərin layiq olduğunu deyə bilməyəcəm”.

“Sağlam İnkişaf və Maarifləndirmə” İctimai Birliyinin sədri Anar Xəlilov təşkil olunan “Yaşıl Texnologiyalar Həftəsi”nin MDB ölkələri arasında ilk dəfə Azərbaycanda keçirildiyini deyib. O bildirib ki, 14-15 dekabr tarixlərində eyni mövzuda beynəlxalq konfransın, gənclərin müxtəlif tədbirlərinin keçirilməsi nəzərdə tutulur.

Qeyd edək ki, həftə Dünya Gənclər Bankının regional ofisinin, Rabitə və İnformasiya Texnologiyaları Nazirliyinin, Gənclər və İdman Nazirliyinin, Gənclər Təşkilatları Milli Şurasının, “Sağlam İnkişaf və Maarifləndirmə” İctimai Birliyinin, “Bakı Gənclər Klubu”nun və “Demokratik İslahatçı Gənclər” İB-nin dəstəyi ilə keçirilir.