Sosial

Ana səhifə

Sosial

Azərbaycan Diplomatik Akademiyasında yeni magistratura proqramının açılışı olub

06 mart 2013 10:41 (UTC +04:00)

Bakı. Şamil Əlibəyli – APA. Azərbaycan Diplomatik Akademiyasında “Biznesin idarəedilməsi” (Executive MBA) magistratura proqramının rəsmi açılış mərasimi keçirilib. APA-nın məlumatına görə, tədbirdə ADA-nın rektoru, xarici işlər nazirinin müavini Hafiz Paşayev, təhsil nazirinin müavini Qulu Novruzov, Niderlandın Azərbaycandakı səfiri Aryen Uiyterlinde, beynəlxalq təşkilatların nümayəndələri və digər qonaqlar iştirak edib.

Tədbirdə çıxış edən rektor Hafiz Paşayev bildirib ki, bu gün akademiya öz 7 illiyi qeyd edir. O deyib ki, akademiyada hər il bir yenilik baş verir və bu da ildönümünün qeyd edilməsinin əhəmiyyətini artırır: “Bu il belə yeniliklərdən biri ADA-da “Biznesin idarəedilməsi” proqramının başlanmasıdır və sentyabrdan biz artıq tələbə qəbuluna da başlayacağıq. Bu proqram üzrə oxuyacaq tələbələr ikili diplom alacaqlar və bu da o deməkdir ki, yaxşı təhsil almaq üçün bizim tələbələrin xaricə getməsi heç də vacib məsələ olmayacaq”.

Sonra çıxış edən səfir A. Uiyterlinde iki tərəfdaş ölkə arasında bu cür layihənin həyata keçirilməsinin əhəmiyyətli olduğunu söyləyib. Səfirin fikrincə, bu proqram Azərbaycan və Niderland tələbələrinin şəbəkələşməsinə, onlar arasında təcrübə mübadiləsinin aparılmasına mühüm töhfə verəcək.

ADA-da 2013-2014-cü tədris ilindən başlayaraq tələbə qəbul edəcək yeni “Biznesin idarəedilməsi” magistratura proqramı 2 illik ali təhsil proqramıdır və azı 4 illik iş təcrübəsi olan namizədlər üçün nəzərdə tutulub. “Executive MBA” Azərbaycan Diplomatik Akademiyası ilə Niderlandın Maastriht Menecment Məktəbi arasında ikili dərəcə proqramıdır, yəni proqramın sonunda məzunlar həm ADA-nın, həm də Maastriht Menecment Məktəbinin diplomları ilə təltif olunacaqlar. Dərslər ADA və Maastriht Menecment Məktəbinin professorları tərəfindən aparılacaq. Tələbələrin proqramın bir hissəsini Niderlandda bitirməsi nəzərdə tutulub. Sənəd qəbulu rəsmi açılış günündən başlayaraq cari il iyunun 15-dək davam etdiriləcək.