Bakı. Kəmalə Quliyeva - APA. Azərbaycanın sürüşmə və uçqun sahələrində aparılan monitorinqlərin nəticələri açıqlanıb. ETSN-ın Kompleks Hidrogeologiya və Mühəndis Geologiyası Ekspedisiyasının ekzogen geoloji proseslərin öyrənilməsi partiyasının rəisi Sadiq Əmiraslanovun APA-ya verdiyi məlumata görə, monitorinqin nəticələrinə əsasən, Abşeron yarımadasındakı sürüşmə sahələrində ciddi aktivlik müşahidə olunmur: “Yalnız Zığ sürüşmə sahəsində nisbi aktivlik qeydə alınıb. Qalan sürüşmə sahələrində vəziyyət stabildir, ciddi dəyişmə yoxdur. 20-ci sahədə baş verən uçqundan sonra həmin ərazidəki uçqun sahələrində də ciddi aktivləşmə qeydə alınmayıb”.
Respublikanın avtomobil yollarındakı sürüşmə sahələrində isə aktivlik artıb: “Demək olar ki, sürüşmə mövcud olan bütün avtomobil yollarında aktivləşmələr qeydə alınıb. Bakı-Şamaxı avtomobil yolunun 104-111-ci km-də aktivlik artıb. Lənkəran-Lerik avtomobil yolunun 17-19-cu km-də də aktivləşmə var. Bu yolda uçqun sahələri də aktivləşib, yeni daş uçqunları əmələ gəlib. Həmin yolun uzunluğu ümumilikdə 53 km-dir. Yolun hər 2-3 kilometrindən bir 11-12 sürüşmə-uçqun sahəsi mövcuddur. Ağsu aşırımında mövcud olan 20-dək sürüşmə sahəsinin hamısında aktivlik müşahidə olunub. Muğanlı-İsmayıllı yolunun 2-11-ci km-dəki sürüşmə sahəsində də aktivlik artıb”.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
