Turizm

Ana səhifə

Turizm

Bakıda IX Azərbaycan Beynəlxalq Turizm və Səyahətlər Sərgisi keçiriləcək

23 fevral 2010 10:10 (UTC +04:00)

Bakı. Nicat Mustafayev – APA-Economics. Bu ilin aprel ayının 28-30-da Böyük Britaniyanın «ITE Group» şirkətinin Qafqazdakı eksklüziv tərəfdaşı olan «Iteca Caspian» şirkətinin təşkilatçılığı ilə Bakıda IX Azərbaycan Beynəlxalq Turizm və Səyahətlər Sərgisi («AITF 2010») keçiriləcək.

«Iteca Caspian»dan «APA-Economics»ə verilən məlumata görə, 100-dən artıq şirkətin iştirak edəcəyi sərgidə kommersiya təşkilatları ilə yanaşı, hər bir turizm sərgisi üçün əsas dəyərlərdən biri sayılan milli stendlər də nümayiş olunacaq. Bu stendlərdə Yunanıstan, Misir, Hindistan, Malayziya, Birləşmiş Ərəb Əmirlikləri milli koloritlərini nümayiş etdirəcəklər. Bu il ilk dəfə olaraq «AITF 2010» sərgisinin tərəfdaş ölkəsi qismində Türkiyə çıxış edəcək. Bundan əlavə, Türkiyə ötən illə müqayisədə ekspozisiya sahəsini 40% genişləndirərək sərgidə ənənəvi olaraq öz milli stendi ilə iştirak edəcək.

Bununla yanaşı, tədbirdə Tailand, Seyşel adaları, Mavriki və bir sıra digər ekzotik guşələr də geniş şəkildə təqdim olunacaq. İsveçrənin turizm operatorları müxtəlif kateqoriyalı turistlər üçün geniş seçim imkanlarını təqdim edəcək. Sərgidə ilk dəfə olaraq ziyarətçilərə sanatoriyalarda müalicə üzrə geniş xidmətlər diapazonunu təklif edən Stavropol diyarının stendi təqdim olunacaq. Azərbaycan şirkətlərinin ekspozisiyası isə sərginin 45%-ni təşkil edəcək. Bu sərgidə Azərbaycanın regionları aktiv şəkildə təqdim olunacaq. Sərgi ilə paralel olaraq keçiriləcək dolğun tədbirlər proqramına seminarlar, təqdimat mərasimləri, mükafat lotereyaları daxil olacaq.

«AITF 2010» sərgisi ilə yanaşı, «Mehmanxana, Restoran və Supermarketlər üçün Avadanlıq və Ləvazimatlar» IV Qafqaz Beynəlxalq Sərgisi («HOREX 2010») də keçiriləcək. Bu sərgidə mehmanxana, restoran və supermarketlər üçün kompleks təchizat, ticarət köşkləri, mətbəx avadanlıqları, qəlyanaltı sistemləri, mehmanxana və restoranlar üçün mebel və bir çox digər avadanlıqlar nümayiş etdiriləcək.

Qeyd edək ki, «AITF 2010» sərgisinin hər il artan göstəricilərini nəzərə alaraq, bu il ilk dəfə olaraq Ümumdünya Sərgi Sənayesi Assosiasiyası (UFI) tərəfindən sərginin təşkili ilə bağlı audit yoxlaması keçiriləcək. Artıq bir neçə ildir ki, Azərbaycanda keçirilən sərgilərdə illik audit yoxlaması aparılır və «Caspian Oil & Gas», «BakuBuild», «WorldFood Azerbaijan», «BIHE», «BakuTel», «AutoShow» kimi sərgilər keyfiyyət nişanına layiq görülüb.

Xatırladaq ki, «Iteca Caspian» şirkəti 2010-cu ildə 16 sərgi və 2 konfrans keçirməyi planlaşdırır.