Turizm

Ana səhifə

Turizm

Yay mövsümündə Azərbaycanın daxili turizm bazarında 15 faiz artım qeydə alınıb

06 sentyabr 2010 09:26 (UTC +04:00)

Bakı. Ülkər Qasımova-APA. 2010-cu ilin yay mövsümündə daxili turizm bazarında 15 faiz artım olub. Bu açıqlamanı APA-ya Mədəniyyət və Turizm Nazirliyinin daxili turizmin inkişafı sektorunun müdiri Mahir Qəhrəmanov verib. O bildirib ki, başa çatmaq üzrə olan yay mövsümündə daha çox Quba-Xaçmaz, Şəki, Qəbələ-İsmayıllı bölgələrinə turist axını müşahidə olunub: “Bunun səbəbi yol infrastrukturunun çox yüksək səviyyədə təmir edilməsi, məsafənin az olması, həmin bölgələrdə əvvəlki illərə nisbətən turizm xidməti infrastrukturunun yaxşılaşması və genişlənməsi, eyni zamanda turizm obyektlərində göstərilən xidmətin müxtəlifliyi və çeşidliliyidir. Doğrudur, buradakı əlavə xidmətlər bizi qane edən səviyyədə deyil, ancaq çalışırıq və tövsiyələr edirik ki, gələn turistlərin vaxtlarının səmərəli keçirilməsi üçün yerləşmə obyektlərinin sahibləri əlavə xidmətlər göstərsinlər, yerli sakinlərin imkan və bacarıqlarından istifadə etsinlər”.

M. Qəhrəmanovun sözlərinə görə, cari il ərzində nazirlik əməkdaşları tərəfindən Cənub, Şimal, Şimal-Qərb bölgəsi olmaqla 120-dən çox turizm obyektinə baxış keçirilib: “Baxış zamanı mövcud olan iradlar göstərilib və qeyd olunub, onların aradan qaldırılması üçün təkliflər verilib. Lisenziyasız fəaliyyət göstərən obyektlər haqqında Vergilər Nazirliyinə müraciət etmişik, həmin obyektlərin siyahısını açıqlamışıq və əhaliyə tövsiyə etmişik ki, həmin obyektlərin xidmətlərindən istifadə etməsinlər. Biz bu halı daha çox bazarın üzərinə atırıq. Biz sahibkarlara geniş imkanlar yaradırıq və artıq turist, xidmətdən istifadə eləyən istehsalçı özü seçəcək, kim yaxşı xidmət göstərir, ora gedəcək”. Nazirlik rəsmisi bildirib ki, turizm obyektinin sahibkarı daima öz üzərində çalışmalı, obyektində çalışan işçilərin peşə hazırlıq səviyyəsinin artırılmasına, savadlı, qonaqpərvər, xidmətin yüksək səviyyədə göstərməsinə müvəffəq olmalıdır.