Turizm

Ana səhifə

Turizm

Azərbaycanın turizm sektoru üzrə aparılan tədqiqatın nəticələri açıqlanıb

07 oktyabr 2010 12:36 (UTC +04:00)

«APA-Economics» xəbər verdiyi kimi, bu barədə Azərbaycan-Türkiyə İş Adamları Birliyinin (ATİB) bu gün açıqladığı «Azərbaycanın turizm sektoru» adlı tədqiqatında məlumat verilir.

Hesabatın müəllifi, Turizm İnstitutunun Tədqiqat və İnkişaf Mərkəzinin rəhbəri Eldar Aslanov bildirib ki, 2002-ci ildən indiyədək Azərbaycanda otellərin sayı 4 dəfə artıb. Bu gün ölkədə 425 otel fəaliyyət göstərir, daha 40 otelin tikintisi gedir. Tədqiqatda bildirilir ki, 1000-dən artıq təbii mineral su mənbələri, 250-dən artıq gölü, əla iqlimi, 7000-dən artıq tarixi abidəsi, geniş mətbəxi olan Azərbaycanda turizmin müxtəlif növlərinin (ekstremal, idman və dini turizm) inkişaf etdirilməsi üçün geniş imkanlar mövcuddur.

Son illər görülən işlər və ölkənin turizm imkanlarının artması nəticəsində son 3 ildə Azərbaycandan xaricə gedən turistlərin sayı azalıb. Bununla yanaşı, ölkədə turizm xidmətlərinin istifadəçilərinin əsas hissəsi (70%-i ) yerli vətəndaşlardır.

E.Aslanovun sözlərinə görə, xidmətlərin lazımi səviyyədə olmaması fonunda qiymətlərin yüksək olması Azərbaycanın turizm sahəsində rəqabət imkanlarını azaldır: «Turizm xidmətlərinin səviyyəsi Türkiyə, BƏƏ və Gürcüstandan yüksək olmayan Azərbaycanda qiymətlər onlardan yüksəkdir». Ölkədəki otellərdə yataq yerlərinin məhdudluğu (5* sinfinə aid cəmi 2000 yataq yeri), nəqliyyat infrastukturunun lazımi səviyyədə olmaması da xarici turistlərin sayına təsir edir.

Tədqiqat müəlliflərinin fikrincə, ölkəyə xarici turistlərin cəlb olunması üçün bəzi addımlara ehtiyac var. Bunun üçün turizm obyektlərində xidmət səviyyəsi yüksəldilməli, viza-sərhəd rejimi yumşaldılmalı, otellərin və digər turizm obyektlərinin lisenziya və sertifikatlaşdırılması sadələşdirilməli, ölkənin regionlarında evlərini turistlərə kirayəyə verən kənd sakinlərinin bu sahəyə cəlb olunması üçün onlar arasında maarifləndirmə işləri aparılmalı, vergi güzəştləri tətbiq edilməli, ölkəyə gələn xarici mütəxəssislər üçün miqrasiya qanunvericiliyi sadələşdirilməlidir.