Turizm

Ana səhifə

Turizm

Şanxayda “EXPO-2010” Ümumdünya Universal Sərgisi çərçivəsində Azərbaycan günü qeyd olunub - FOTO

Şanxayda “EXPO-2010” Ümumdünya Universal Sərgisi çərçivəsində Azərbaycan günü qeyd olunub - <font color=red>FOTO</font>

20 oktyabr 2010 10:38 (UTC +04:00)

Bakı. Laçın Sultanova - APA. Şanxayda keçirilən «EXPO-2010» Ümumdünya Universal Sərgisi çərçivəsində Azərbaycan günü qeyd olunub.

APA-nın «CRI online» saytına istinadən məlumatına görə, Azərbaycan gününün açılışında Azərbaycan baş nazirinin müavini Abid Şərifov və Çinin əmək resursları və sosial təminat nazirinin müavini Van Syaoçu iştirak ediblər.

A.Şərifov deyib ki, «Şəhərin yaxşı olması, həyatın yaxşı olmasıdır» devizi altında keçirilən sərgi milli iqtisadiyyatların nailiyyətlərini və müxtəlif ölkələrin gələcək inkişafını nümayiş etdirmək üçün vacib əhəmiyyət daşıyır və beynəlxalq ictimaiyyətə bir sıra məsələlərin həlli üçün yardım edir.

Van Syaoçu əmin olduğunu bildirib ki, “EXPO” Çin və Azərbaycan xalqları arasında əlaqələri möhkəmləndirəcək, iki ölkə arasında dostluq və əməkdaşlıq yeni mərhələyə qalxacaq.

Azərbaycan pavilyonunun əsas mövzusu «Qərblə Şərqin kəsişdiyi yer» adlanır. Pavilyonun ümumi ərazisi 324 kvadrat metrdir. Pavilyonda Azərbaycanın tarixi mirası və qədim mədəniyyəti ilə yanaşı, iqtisadi imkanları və mədəniyyəti nümayiş etdirilir.

Pavilyonun direktoru Nazim Tatlıyev «Sinxua» agentliyinə müsahibəsində deyib ki, indiyə kimi pavilyonu 2,5 milyon izləyici seyr edib: «Biz öz stendlərimizdə Azərbaycan şəhərlərini, müxtəlif sahələrin inkişafını göstərməyə çalışmışıq. Bu, həm neft sektoru, həm səhiyyə, turizm sahələridir».

O həmçinin bildirib ki, pavilyon hər il 500-ə yaxın hədiyyələr hazırlayaraq məktəblilərə və uşaqlara paylayır. Pavilyon Çinin Sıçuan vilayəti vasitəsilə 2008-ci il mayın 12-də zəlzələnin baş verdiyi rayonların məktəblilərinə və Şanxayda yaşayan yetimlərə hədiyyələr edib.

Açılış mərasimində «Natiq» ritm qrupu, Azərbaycan Dövlət Simfonik Orkestri və Dövlət Rəqs Ansamblı çıxış ediblər.