Turizm

Ana səhifə

Turizm

Yeni ili xaricdə qarşılayan azərbaycanlıların sayı ilbəil artır

30 dekabr 2010 11:56 (UTC +04:00)

Bakı. Nicat Mustafayev - APA-Economics. Yeni il bayramını ölkədən kənarda keçirən Azərbaycan əhalisinin sayı ilbəil artmaqdadır.

«APA-Economics»in apardığı araşdırma Azərbaycan vətəndaşlarının Yeni il ərəfəsində və bayramı qeyd etmək üçün ən çox hansı xarici ölkələri ziyarət etdikləri müəyyənləşdirib.

Belə ki, Azərbaycan əhalisinin əksəriyyəti sözügedən bayramı Gürcüstan, Türkiyə və Birləşmiş Ərəb Əmirliklərində (BƏƏ) qeyd etməyə üstünlük verib. Gürcüstana səfər edən soydaşlarımız əsasən dağ-xizək kurortu sayılan Bakuriani istirahət zonasına, Qudauri və Tiflisə istiqamətləniblər. Türkiyəni ziyarət edən Azərbaycan vətəndaşları isə üstünlüyü əsasən İstanbul və Antalya şəhərlərinə verib. Sirr deyil ki, BƏƏ-yə qedən azərbaycanlı turistlər bayramı Dubayda keçirəcək, bununla belə, yanvar ayında Dubayda ənənəvi «şopinq» festivalı keçiriləcək ki, bu festival da bütün dünyadan turistləri neçə illərdir cəlb edir.

Azərbaycanda fəaliyyət göstərən aparıcı turizm şirkətlərindən həmçinin bildirilib ki, Azərbaycandan turistlər Yeni il tətillərini Avropa şəhərlərində də keçirəcək. Belə ki, soydaşlarımız Praqa (Çexiya), Vyana (Avstriya), Barselona və Madrid (İspaniya), Roma və Milan (İtaliya) kimi şəhərlərə üz tutub. Turistlərin bir hissəsi isə Avropa şəhərlərinin bir neçəsini ziyarət etmək imkanını yaradan turpaketləri əldə edib.

Eyni zamanda Azərbaycan turistlərinin kiçik hissəsi Yeni il bayramını Moskva həşəri və Uludağ kurortunda (Bursa - Türkiyə) qeyd etməyə üstünlük verib. Əgər Moskva aeroportlarında hazırda baş verən hadisələr turistləri bu şəhərə getməkdən çəkindiribsə, azərbaycanlı turistlərin Uludağ kurortuna az getməsi oranı tanımaması səbəbindən olub.

Bundan başqa, Azərbaycan əhalisinin bir hissəsi də bayram tətillərini ölkə daxilində keçirməyə üstünlük verib. Ölkə daxilində əsas istiqamətlər Qəbələ, Lerik və Nabran kimi rayonlar olub.