Turizm

Ana səhifə

Turizm

Azərbaycanın mədəniyyət və turizm naziri yerli turizm şirkətləri və hotel rəhbərləri ilə görüşüb

18 yanvar 2011 16:04 (UTC +04:00)

Bakı. Ülkər Qasımova - APA. Bu gün mədəniyyət və turizm naziri Əbülfəs Qarayev 2011-ci ilin «Turizm ili» elan olunması ilə əlaqədar nazirliyin Turizm şöbəsinin əməkdaşları, turizm şirkətləri və hotellərin rəhbərləri ilə işgüzar görüş keçirib.

Nazirliyin mətbuat xidmətindən APA-ya verilən məlumata görə, görüşdə respublika prezidenti yanında keçirilən müşavirə zamanı Mədəniyyət və Turizm Nazirliyinin hesabatında təqdim olunan faktlar və turizmin inkişafında müşahidə olunan müsbət tendensiyalar, Azərbaycanda turizmin inkişafına xidmət edən infrastrukturun yaranması və getdikcə inkişaf etməsi haqqında fikirlər bir daha vurğulanıb. Görüş zamanı Azərbaycanda 2011-ci ilin «Turizm ili» elan olunması ilə bağlı məsələlər, ilkin tədbirlər planı müzakirə olunub, bilavasitə turizm şöbəsinin və nazirliyin digər strukturlarının, ayrı-ayrı turizm şirkətlərinin və otel rəhbərlərinin qarşısında duran vəzifələr müəyyən olunub. Azərbaycanda turizmin qeyri-neft sektoru olaraq ölkə iqtisadiyyatında daha nə kimi rol oynaya biləcəyi perspektivləri nəzərdən keçirilib, prezident tərəfindən uzaqgörənliklə təklif olunan «Turizm ili» anlayışının turizm sənayesində hansı böyük iqtisadi sıçrayışlarla, beynəlxalq siyasi və mədəni müstəvidə hansı uğurlarla nəticələnəcəyindən söz açılıb.

Ə.Qarayev ölkə prezidentinin tapşırıqlarını əsas tutaraq turizm sektorunda çalışanları fəal olmağa, beynəlxalq və yerli turizm sərgilərində mütəmadi iştirak etməyə, bu sahənin inkişafına xidmət edə biləcək yeni və cəsarətli, Azərbaycan turizmini beynəlxalq standartlar səviyyəsinə daha da yaxınlaşdıracaq təkliflərlə çıxış etməyə dəvət edib, peşəkarlara bu günə qədər əldə olunan nailiyyətlərlə kifayətlənməyib mövcud çatışmazlıqlara da diqqət yetirməyi tövsiyə edib.

Daha sonra turizm şirkətləri və hotel rəhbərləri mövcud problemlərdən danışıb və təkliflərlə çıxış ediblər.

Qeyd edək ki, görüş prezidenti İlham Əliyevin 2011-ci ili «Turizm ili» elan etməsi ilə əlaqədar olaraq keçirilib.