Turizm

Ana səhifə

Turizm

Misirin kurort şəhərlərinin hotelləri endirim kampaniyalarına başlayır

14 fevral 2011 14:55 (UTC +04:00)

Bakı. Nicat Mustafayev - APA-Economics. Misirin Şarm-əş-Şeyx və Xurqada kurort şəhərlərinin hotelləri möhtəşəm endirim kampaniyalarına başlamaq niyyətindədir.

«APA-Economics»in məlumatına görə, hazırda kurort şəhərlərinin mehmanxanalarında istirahət edən turistlər ölkəni tərk etdikdən sonra hotellər mənfəətsiz işləyərək endirimlər edib turist axınını bərpa etmək niyyətindədir. Belə ki, Misirin hotelləri 20-40% endirim aksiyalarına başlayacağını bildirib.

Misirdə baş verən iğtişaşlara görə bir çox ölkələrin turoperatorları Misirə turpaketlərin satışını dayandırması turist axınının azalmasına səbəb olub. Buna baxmayaraq, bu ölkəyə turpaketləri təşkil edən turizm şirkətləri də tapılıb. Onların sırasında «Thomas Cook», «TUI» və «Kuoni» kimi turoperatorlar mövcuddur.

Qeyd edək ki, Azərbaycanın da bəzi turizm şirkətləri mart ayında (Novruz bayramı günlərində) Misirin sözügedən kurort şəhərlərinə çarter aviareyslər təşkil etmək niyyətindədir.

Hazırda Misirdə iki həftədən artıq davam edən iğtişaşlar başa çatıb. İğtişaşlar nəticəsində ölkə prezidenti Hüsni Mübarək istefaya gedib.