Turizm

Ana səhifə

Turizm

Nazir: “Bu il Azərbaycana gələn turistlərin sayının 2 mln. nəfəri keçməsini istəyirik”

02 mart 2011 12:51 (UTC +04:00)

Bakı. Ülkər Qasımova - APA-Economics. 2011-ci ilin Azərbaycanda “Turizm ili” elan edilməsi ilə bağlı Azərbaycanda bir neçə otelin açılışı nəzərdə tutulur.

“APA-Economics”in məlumatına görə, bunu jurnalistlərə açıqlamasında mədəniyyət və turizm naziri Əbülfəs Qarayev deyib.

Nazir bildirib ki, il ərzində Azərbaycanda yeni turizm məkanlarının formalaşması üçün xüsusi proqramların hazırlanması nəzərdə tutulur: “Biz arzulayırıq ki, turizm ilinin nəticəsi kimi artıq növbəti illərdə zonalarda təsdiq olunmuş layihələr üzrə işlər davam etdirilsin və Azərbaycana gələn turistlərin sayı çoxalsın. Ötən il Azərbaycana ilk dəfə olaraq 1 mln. 900 min nəfərdən artıq əcnəbi gəlib, onlardan 1 mln. 500 min nəfərdən çoxunu turist kimi qəbul etmişik. 2011-ci ildə Azərbaycana gələn turistlərin sayında 2 mln. nəfəri aşmaq istəyirik. Bu ilin sonuna kimi Azərbaycana 2 mln. ziyarətçi gəlsə, növbəti beş il müddətində 3 mln. nəfərdən də artıq olmasını nəzərdə tuturuq”.

Azərbaycanda müalicə turizmi ilə bağlı bir sıra layihələrin də həyata keçirildiyini diqqətə çatdıran Ə.Qarayev Azərbaycanda artıq bu tendensiyanın genişləndiyini vurğulayıb. Nazir Naxçıvandakı duzlaq mərkəzini bu sırada xüsusi qeyd: “Azərbaycanda turizm xidmətlərinin müxtəlifliyinin təşkili mütləqdir. Artıq Naftalanda böyük müəssisələr açılır. Bu tipli müəssisələr Lənkəranda da var. Bu işin təkmilləşdirilməsinə ehtiyac var. Dövlət başçısının Azərbaycanda kurortologiya sahəsinin inkişafı ilə bağlı xüsusi sərəncamına müvafiq olaraq dövlət qurumları artıq bununla məşğuldurlar. Biz kurortologiya sahəsində görüləcək işləri “Turizm ili” çərçivəsində ümumi plana daxil etmək niyyətindəyik”.