Turizm

Ana səhifə

Turizm

Moskvada MDB ölkələrində turizmin inkişafına həsr olunmuş beynəlxalq konfrans keçirilib

15 mart 2011 12:44 (UTC +04:00)

Moskva. Fərid Əkbərov - APA. Rusiya paytaxtında Müstəqil Dövlətlər Birliyi (MDB) ölkələrində turizmin inkişafına həsr olunan birinci beynəlxalq konfrans keçirilib.

APA-nın Moskva müxbirinin verdiyi məlumata görə, MDB məkanında “Tarixi mədəni irs ili” çərçivəsində keçirilən tədbir Rusiya Federal Turizm Agentliyi (Rosturzim) və MDB Ölkələrarası Humanitar Əməkdaşlıq Fondu tərəfindən təşkil olunub. İki gün davam edəcək konfransda 200 nəfər, ö cümlədən MDB ölkələrindən 75 səlahiyyətli nümayəndə iştirak edir.

Konfransda Azərbaycandan Bakı Turizm İnformasiya Mərkəzinin direktoru Zakir Əliyev, Azərbaycan Turizm Assosiasiyasının sədri Nahid Bağırov, Azərbaycan Turizm Universitetinin rektoru Cəfər Cəfərov, Dövlət Xalça Muzeyinin nümayəndəsi Nadir Mehdiyev və Azərbaycan Mədəniyyət və Turizm Nazirliyinin nümayəndəsi Kəmalə Həsənova iştirak ediblər.

Konfransı giriş sözü ilə açan Rusiya Federal Turizm Agentliyinin sədr müavini Aleksandr Radıkov konfransın məqsədindən və qarşıya qoyulan tapşırıqlardan danışıb. Daha sonra Azərbaycanın Rusiyadakı fövqəladə və səlahiyyətli səfiri Polad Bülbüloğlu çıxış edib. Səfir turizmin MDB ölkələri arasında dialoqun qurulması üçün yaxşı əsas olduğunu söyləyib. Azərbaycan hökumətinin turizm siyasəti sahəsində gördüyü işlərdən danışan P.Bülbüloğlu prezident İlham Əliyevin göstərişi ilə 2011-ci ilin Azərbaycanda turizm ili elan olunduğunu bildirib.

Daha sonra Azərbaycan nümayəndə heyətinin üzvü Zakir Əliyev Azərbaycanda turizm komplekslərinin yaranması strategiyası və turizm sferasının inkişafından söz açaraq, ölkəmizin zəngin turizm potensialına malik olduğunu söyləyib.