Turizm

Ana səhifə

Turizm

Şahdağ Qış-Yay Turizm Kompleksinə 2 mlrd. dollar investisiya qoyulacaq

04 aprel 2011 14:43 (UTC +04:00)

Bu barədə «APA-Economics»ə Mədəniyyət və Turizm Nazirliyinin İnvestisiya və texniki proqramlar şöbəsinin müdiri Ruslan Abdulalimov bildirib.

Layihəyə görə, Şahdağ Qış-Yay Turizm Kompleksinin ərazisində 10-12 otel, qolf klub, 160-180 kottec olacaq, akva-park və digər obyektlər (işçilərin yaşaması üçün yerlər, avtomobil dayanacaqları, texniki işlərin aparıldığı emalatxanalar və s.) olacaq. Mehmanxanaların minimum 3 ulduzlu olması nəzərdə tutulur.

Şöbə müdirinin dediyinə görə, kompleksə sərmayə qoymaq istəyən investorlara ümumi plana uyğun olaraq obyektin ümumi eskiz layihəsi verilir: «Burda obyektin görünüşü, digər göstəriciləri, o cümlədən hansı səviyyəli olması qeyd olunur, yəni burda göstəriləcək xidmətlərin səviyyəsi razılaşdırılır». Tikinti işlərinə Mədəniyyət və Turizm Nazirliyinin nümayəndələri, eləcə də kompleksin rəhbərliyi nəzarət edir. Nazirlik hazırda kompleksdə tikilən hotelin ilin sonunadək hazır olacağına ümid edir.

Turizm kompleksini layihədə nəzərdə tutulan həddə gətirmək üçün bura 2 mlrd. dollardan çox investisiya qoyuluşu tələb olunur: «Prosesin özü isə azı 6-7 il davam edəcək. İndiyədək görülən işlər bütünlüklə dövlət vəsaiti hesabına aparılıb. Bundan sonra isə kompleksə özəl investisiyalar cəlb ediləcək».

Qeyd edək ki, bir müddət əvvəl prezident İlham Əliyevin də kompleksin 2 nömrəli kanat və xizək enişinin açılışında iştirak edərkən investorları bu kompleksə investisiya qoymağa dəvət edib: «Mən ümid edirəm ki, gələcək illərdə burada əlavə investisiyalar qoyulacaq. Birinci mərhələdə bütün investisiyalar dövlət tərəfindən qoyulur. Yollar, elektrik, qaz, su xətləri dövlət tərəfindən çəkilir. Bütün infrastruktur, birinci mehmanxana dövlət hesabına tikilir. Çox ümid edirəm ki, bundan sonra özəl sektor, investorlar və yerli iş adamları da bu gözəl bölgəyə sərmayə qoyacaqlar».

Şahdağ Qış-Yay Turizm Kompleksində qısamüddətli, hətta bir günlük istirahət etmək də mümkün olacaq. İstəyənlər bura yalnız xizək sürmək üçün bir günlüyə də gələ biləcəklər. R.Abdulalimovun sözlərinə görə, kompleksdəki qiymətlər burda müxtəlif səviyyəli insanların istirahətinə və idmanla məşğul olmasına imkan verəcək: «Bura müxtəlif insanlar gələ biləcək, daha dəqiqi, iqtisadi imkanları orta və ondan yuxarı olanlar».

Kompleksin müştərilərinin əksəriyyətinin xarici turistlər olacağı gözlənilir. Şöbə müdirinin sözlərinə görə, Azərbaycan bu turizm kompleksinə Türkiyə, İran, Rusiya, Çin, Hindistan, MDB və ərəb ölkələrindən turistləri cəlb etməyə ümid edir.

Qeyd edək ki, qış istirahət kompleksləri qonşu ölkələrdə - Gürcüstan, Türkiyə, Rusiya, hətta Ermənistanda da mövcuddur. R.Abdulalimovun sözlərinə görə, Şahdağ kompleksi qonşu ölkələrlə rəqabət aparmaq iqtidarında olacaq: “Bizdə kompleksin layihəsini İsveçrə və Avstriya mütəxəssisləri hazırlayıb, burdakı xidmətlərin səviyyəsi həmin ölkələrdəki kimi olacaq. Yəni qurğular və xidmətlərin səviyyəsi qonşu ölkələrdən qat-qat yüksək olacaq. Qiymətlər də buna uyğun müəyyənləşdiriləcək”.

Xatırladaq ki, Qusar şəhərindən 30 kilometr şimalda, rayonun Dağlıq Alayan kəndi ərazisində yerləşən Şahdağ Qış-Yay Turizm Kompleksinin inşasına 2009-cu ilin sentyabrında başlanıb. Fevralın 27-də Şahdağ Qış-Yay Turizm Kompleksinin 2 nömrəli kanat və xizək enişinin açılışı olub.