Turizm

Ana səhifə

Turizm

Şimali Kipr Azərbaycanın turizm bazarında Antaliyanın rəqibinə çevrilir

27 aprel 2011 10:45 (UTC +04:00)

«APA-Economics»in məlumatına görə, Şimali Kiprin turizm qurumlarının nümayəndələrinin iştirakı ilə Bakıda keçirilən təqdimat mərasimində bildirilib ki, iyunun 21-dən bu ölkəyə turizm məqsədləri ilə birbaşa uçuşlar həyata keçiriləcək.

Təyyarə reysləri iyun ayından başlayaraq həftədə iki dəfə – həftənin II və V günlərində - 219 yerlik «Airbus-319» təyyarə ilə həyata keçiriləcək. Bakıdan qalxan təyyarə Türkiyənin Adana şəhərində qısamüddətli enmə ilə yoluna davam edəcək. Adanadakı enmə zamanı sərnişinlər təyyarədən çıxmırlar. Ümumilikdə, Bakıdan çıxandan 3,5 saat sonra təyyarə Şimali Kiprin paytaxtı – Lefkoşa şəhərinin Ərcan hava limanına çatır. Yəni, uçuş faktiki olaraq birbaşa həyata keçirilir.

Səfərlərin təşkilatçılarından olan Şimali Kiprin «DMG Cyprus» şirkətinin nümayəndəsi Bora Özgenin sözlərinə görə, bu il Türkiyəyə turist səfərlərinin kəskin bahalaşması fonunda Şimali Kipr xarici turistlər üçün daha sərfəli şərtlər təklif edir. «Misir və Tunisdəki hadisələr nəticəsində bütün dünya Antalyaya gəlir. Nəticədə, bu il Türkiyədə qiymətlər çox yüksəkdir. Bundan başqa, Antalya hotellərində yer problemi də var. Şimali Kiprin qiymətləri isə Türkiyəyə nisbətən daha əlverişli olacaq».

Təşkilatçıların sözlərinə görə, Şimali Kiprdə istirahətin qiyməti 600 manatdan (3 ulduzlu hotellər üçün) 900-1000 manatadək (5 ulduzlu hottelər üçün) dəyişir.

Hələlik Şimali Kiprə turist səfərlərini iki yerli şirkət «Millenium Turizm» və «NTravel» şirkətləri təşkil edəcək. «Millenium Turizm»in təmsilçisi Vüqar Əliyevin sözlərinə görə, Şimali Kipr həm xidmət səviyyəsinə, həm də qiymətlərə görə Türkiyənin Antalya, Bodrum, Marmaris kimi kurortları ilə rəqabət apara biləcək.

Şimali Kiprin «Restur» agentliyinin direktoru Rəsmiyə Canaltay isə burada kazinoların da olduğunu bildirib: «İstənilən qədər kazino var. Turistlərin 15-20%-i bura məhz kazinoda oynamaq üçün gəlir».

Şimali Kiprin Turizm Nazirliyinin nümayəndəsi Şahap Aşiqoğlunun sözlərinə görə, azərbaycanlı turistləri qəbul etmək üçün ölkədə ideal şərait var: «Hotellər, təbiət, mətbəx və ən əsası qənaətli qiymətlər. İnanırıq ki, azərbaycanlı turistlər bunu qiymətləndirəcəklər».

Nazirlik nümayəndəsi bildirib ki, təyyarə uçuşları ilə bağlı problem olmayacaq: «Novruz Bayramında artıq belə bir uçuş olub və uğurla həyata keçirilib». Bundan başqa, Şimali Kipr hökuməti ölkəyə turistləri cəlb eləmək üçün turizm şirkətlərinə əlavə güzəştlər verir. Yəni, ölkəyə gələrək 7 gün qalan hər turist üçün hökumət turizm şirkətinə 65 avro ödəyir, bu isə turist paketinin qiymətindən çıxılır və istirahət qiymətini aşağı salır. Ölkəyə gətirilən turistlərin sayı müəyyən həddi keçəndə isə həmin şirkətlər pulsuz reklam olunur.

Qeyd edək ki, Şimali Kiprə ilk uçuş zamanı turpaketlər güzəştli qiymətlərlə təqdim olunacaq və cəmi 400 manat təşkil edəcək. Müqayisə üçün bildirək ki, iyun ayına Antalyaya eyni şəraitli turpaketin qiyməti təxminən 600 manat təşkil edir.