Turizm

Ana səhifə

Turizm

Azərbaycanın ilk online turist portalı apardığı araşdırmaların nəticələrini açıqlayıb

03 may 2011 14:53 (UTC +04:00)

Bakı. Nicat Mustafayev – APA-Economics. Bu gün Bakıda Azərbaycan Mədəniyyət və Turizm Nazirliyi www.gomap.az online turist portalının fəaliyyəti çərçivəsində aparılmış araşdırmalara həsr olunmuş mətubat konfransı keçirib.

«APA-Economics»in məlumatına görə, tədbirdə çıxış edən Nazirliyin Aparat rəhbəri Firudin Qurbanov ölkənin turizm potensialından danışıb və bildirib ki, ümumiyyətlə turizm sahəsi ölkə iqtisadiyyatında mühüm yer tutur, tədiyyə balansını yaxşılaşdırır, büdcə gəlirlərini artırır: «Azərbaycanda turizm sahəsinin inkişafı üçün müvafiq infrastrukturun yaradılması istiqamətində bir sıra işlər görülür, dövlət proqramı icra olunur, həmin dövlət proqramı çərçivəsində tədbirlər planı hazırlanır ki, plana əsasən, turizm sahəsində yeni texnologiyaların tətbiqi nəzərdə tutulub».

İki ildən artıq gomap.az portalı üzrə işlərin aparıldığını bildirən F.Qurbanov onu da qeyd edib ki, aparılan monitorinqin nəticələrinə əsasən, hazırda Azərbaycan vətəndaşları ilə yanaşı portala Rusiya, Türkiyə, Almaniya, ABŞ və Ermənistan kimi ölkələr maraq göstərir: «Hazırda portala gündə 5 mindən artıq internet istifadəçisi daxil olur ki, məqsədimiz bu istifadəçilərin sayını artırmaqdır».

Öz növbəsində tədbirdə çıxış edən «SİNAM» şirkətinin prezidenti Elçin Əliyev gomap.az portalından ətraflı məlumat verib və bildirib ki, aprelin ortalarında təqdimatı keçirilən portalda Azərbaycanla bağlı ətraflı məlumat, o cümlədən Milli Elektron Turizm Naviqasiya Sisteminin elektron xəritəsi yer alıb: «Xəritəyə 60 min maraq nöqtələri, 70 şəhər, 4 530 yaşayış məntəqəsi, 3 300 mədəni-tarixi abidə, 670 min bina və tikililər, 43 min km yol (hərəkət qaydaları və yol nişanları daxil olmaqla), 23 770 kv. km yaşılıq sahələri və meşələr və digər məlumatlar daxil edilib. Gomap.az veb-resursunda Azərbaycanın elektron xəritəsi üzrə işlər davam etdirilir».

Tədbirdə həmçinin Azərbaycanın işğal olunmuş ərazilərin bu xəritədə daha da ətraflı göstərilməsi üçün Azərbaycan Mədəniyyət və Turizm Nazirliyinin fəaliyyəti haqqında məlumat verilib. Nazirlik ölkə ictimaiyyətini gomap.az layihəsi çərçivəsində bu fəaliyyəti daha da genişləndmək üçün əməkdaşlığa dəvət edir.

Bundan başqa, tədbirdə Şuşa və işğal olunmuş digər şəhərlərə aid fotoşəkillərin gomap.az komandasına təqdim olunması ilə baglı Mədəniyyət və Turizm Nazirliyinin əhaliyə müraciəti olub. Tədbirdə bildirilib ki, bu fotoşəkillər elektron xəritədə yerləşdiriləcək.