Turizm

Ana səhifə

Turizm

Şəkidə Milli Atüstü Oyunları festivalı keçirilir

07 may 2011 13:44 (UTC +04:00)

Şəki. Vüqar Heydərov - APA. Bu gün Şəkidə Heydər Əliyevin anadan olmasının 88-ci ildönümünə həsr olunmuş Milli Atüstü Oyunları festivalına start verilib. Bu barədə APA-nın Şəki-Zaqatala bürosuna Şəki şəhər İcra Hakimiyyətinin Aparatından məlumat verilib.

Mədəniyyət və Turizm Nazirliyinin təşkilatçılığı və Şəki şəhər İcra Hakimiyyətinin dəstəyi ilə keçirilən yarışlar rayonun Daşüz kəndində yerləşən Respublika Atçılıq Turizm Mərkəzində təşkil edilib. Açılış mərasimində Mədəniyyət və Turizm Nazirliyinin şöbə müdirləri Cavanşir Cəfərov və Fikrət Mehdiyev, Şəki şəhər İcra Hakimiyyətinin başçısının təhsil, səhiyyə və mədəniyyət işləri üzrə müavini Zərinə Cavadova, müvafiq təşkilat və rayon ictimaiyyətinin nümayəndələri iştirak ediblər.

Mayın 10-dək davam edəcək yarışları keçirməkdə məqsəd qədim milli oyunları qoruyub saxlamaq, atçılıq ənənələrinin bərpası, atçılıq turizminin təbliği və inkişafı, habelə gənc nəsildə bu sahəyə marağın oyadılmasıdır. Yarışlara Balakən, Zaqatala, Qax, Şəki, Oğuz, İsmayıllı, Yevlax, Ağdam və Goranboy rayonlarını təmsil edən atçaparlardan ibarət komandalar qatılıb. Komandalar çövkən, sür-papaq, papaq və atüstü güləş oyunları üzrə qüvvələrini sınayacaqlar. Yarışların sonunda münsiflər heyətinin qərarı ilə qalib komandalar Mədəniyyət və Turizm Nazirliyinin diplom və mükafatları ilə təltif ediləcək.

Qeyd edək ki, milli atüstü oyunlar festivalı 2007-ci ildən keçirilir.