Turizm

Ana səhifə

Turizm

“Eurovision”da qalibiyyət Azərbaycanın turizm sektoruna 60 mln. manatadək əlavə gəlir gətirə bilər

16 may 2011 13:37 (UTC +04:00)

Bu barədə «APA-Ekonomics»ə BMT-nin İnkişaf Proqramının Azərbaycanda turizmin inkişafı layihəsinin rəhbəri Faiq Qürbətov bildirib.

Onun sözlərinə görə, ümumiyyətlə, beynəlxalq arenada Azərbaycanın istənilən qələbəsi - istər idman, istər incəsənət sahəsində - Azərbaycanın bir ölkə kimi tanınması üçün böyük əhəmiyyət daşıyır ki, bu da son nəticədə ölkənin turizm sənayesinə müsbət təsir edir: «Azərbaycanın müsabiqədə qalib gəlməsi ən azı Avropada Azərbaycanı tanımayan vətəndaşlara bir istiqamət verəcək və internetdə bizim ölkə barədə əlavə məlumat almağa həvəsləndirəcək».

Ekspert qeyd edib ki, Azərbaycan xarici vətəndaşlar tərəfindən marağa və turist axınına hazır olmalıdır. Belə ki, ölkədəki internet resursları işlərini təkmilləşdirməli və daha yaxşı qurmalıdırlar ki, ölkə haqqında daha dolğun məlumat versinlər: «Eləcə də yeni resurslar yaradılmalı və Azərbaycanın tarixi, mədəniyyəti, turizm imkanları – tarixi yerləri, turist marşrutları barədə daha geniş məlumatlar verilməlidir».

Qeyd edək ki, bir ildən sonra Azərbaycanda «Eurovision» müsabiqəsi keçiriləndə iştirakçılarla yanaşı, ölkəyə çoxsaylı turistlər də gələcək. Yeri gəlmişkən, yaxın vaxtlarda xarici vətəndaşların Azərbaycana gəlməsi üçün viza alınması qaydalarının sadələşdirilməsi də gözlənilir: «Ona görə də ölkənin turizm infrastrukturu da buna artıq indidən hazırlaşmalıdır». Ekspertlərin sözlərinə görə, gələcək turistlərə yüksək səviyyəli xidmət göstərilməsi üçün restoran və mehmanxanalarda əməkdaşlar üçün treninqlərin keçirilməsini, həmin obyektlərdə internet şəbəkələrinin quraşdırılmasını, taksi xidmətinin keyfiyyətinin yüksəldilməsini, sürücülərin az da olsa, xarici dildə danışmasını təmin etmək lazımdır. Bundan başqa, müsabiqənin davam edəcəyi 10-12 gün ərzində turizm şirkətləri turistlərin asudə vaxtını təşkil etmək üçün yaxşı olardı ki, artıq indidən müxtəlif turlar, ekskursiyalar, yaxın rayonlara turizm marşrutları təşkil etsinlər.

F.Qürbətovun sözlərinə görə, müsabiqə zamanı ölkəyə təqribən 10-15 min əlavə turistin gəlməsi gözlənilir. Bunun 2 mini müsabiqəni işıqlandıran mətbuat nümayəndələri, daha 2-3 min nəfər isə təşkilatçılar, iştirakçılar və onları müşayiət edənlərdir.

«Eurovision» müsabiqəsinin Azərbaycanda keçirilməsinin ölkəyə gələn turistlərin sayına təsiri ilə bağlı Mədəniyyət Turizm Nazirliyinin ilkin proqnozları daha optimistdir. Nazirliyin «Daxili turizmin inkişafı» sektorunun müdiri Mahir Qəhrəmanovun sözlərinə görə, hətta belə müsabiqə olmayanda da ölkəyə gələn turistlərin sayı hər il 7%-dək artır. Sonuncu müsabiqə Almaniyaya 70 minə yaxın turist cəlb edib: «Bunu nəzərə alsaq, bu qədər olmasa da, təqribən buna yaxın sayda turistin gəlməsini gözləmək mümkündür». M.Qəhrəmanovun sözlərinə görə, xüsusilə qonşu ölkələrin Azərbaycana marağı böyükdür: «İran, Rusiya və başqa ölkə vətəndaşlarının bura gəlmək ehtimalı çoxdur». Viza rejiminin sadələşdirilməsi də ölkəyə turizm axınını artıracaq.

Amma buna ölkənin turizm infrastrukturu da hazır olmalıdır. Qeyd edək ki, hazırda Azərbaycan hotellərində 31 mindən artıq yataq yeri var. 2012-13-cü illərə kimi bu rəqəmin 50 minə çatdırılması nəzərdə tutulur. Amma müsabiqənin vaxtınadək hotel yerlərinin sayı 40 mindən az olacaq: «Buna görə də müsabiqə dövründə ehtiyac yaranarsa, xarici turistlərin yerləşdirilməsi üçün digər variantlardan, o cümlədən kirayə üsullarından istifadə oluna bilər».

İndiyədək aparılan araşdırmalar göstərir ki, ölkəyə gələn hər turist burda həftə ərzində azı 800 manat pul xərcləyir. Bu rəqəmləri nəzərə alanda müsabiqənin keçirilməsi nəticəsində Azərbaycanın turizm industriyası müxtəlif qiymətləndirmələrə görə, 15-60 milyon manatlıq əlavə gəlirə ümid edə bilər.