Turizm

Ana səhifə

Turizm

Azərbaycan Ukraynada keçirilən turizm sərgi-festivalında iştirak edib

23 may 2011 10:34 (UTC +04:00)

Bakı - APA-Economics. Kiyev (Ukrayna) şəhərinin ən böyük sərgi mərkəzlərindən biri olan “Expocenter Ukraina”da kənd və ekoloji turizmin inkişafına həsr edilmiş turizm sərgi-festivalı keçirilib.

Azərbaycanın Ukraynadakı səfirliyinin mətbuat xidmətindən “APA-Economics”ə verilən məlumata görə, sərgidə müxtəlif turizm şirkətləri tərəfindən kənd və ekoloji turizm sahəsində mövcud təkliflər, marşrut və turlar barədə informasiya sərgilənmiş, mədəni-kütləvi tədbirlər keçirilib.

Azərbaycanın turizm potensialı Azərbaycanın Ukraynadakı səfirliyinin Kiyevdə fəaliyyət göstərən və Azərbaycana turlar təklif edən “AzəriTur” turizm şirkəti ilə əməkdaşlıqda təşkil etdiyi xüsusi stenddə nümayiş etdirilib. Tədbirin açılış mərasimində və mətbuat konfransında çıxış edən Azərbaycanın Ukraynadakı səfiri Eynulla Mədətli ölkəmizin turizm və kurort imkanları, son illər ərzində turizmin inkişafı istiqamətində dövlət tərəfindən həyata keçirilən tədbirlər və əldə edilmiş uğurlar barədə ətraflı məlumat verib.

Sərgi çərçivəsində keçirilən görüşlər zamanı Ukraynanın müxtəlif turizm şirkətləri və turizm nəşrləri ilə Azərbaycana turizm səfərlərinin təşkili və ölkəmizin turizm imkanlarının təbliği istiqamətində ilkin razılaşmalar əldə edilib.

Sərgidə Azərbaycanın Mədəniyyət və Turizm Nazirliyi tərəfindən hazırlanmış Azərbaycana aid müxtəlif bukletlər, broşürlər, disklər qonaqların marağına səbəb olub.