Turizm

Ana səhifə

Turizm

“Mançester Yunayted” - “Barselona” matçı ən bahalı futbol oyunu kimi tarixə düşüb

01 iyun 2011 13:09 (UTC +04:00)

Bakı. Əli Əhmədov - APA-Economics. İngiltərənin «Mançester Yunayted» və İspaniyanın «Barselona» komandaları arasında bu il mayın 28-də Londonun «Uembli» stadionunda keçirilmiş Avropa Çempionlar Liqasının final oyunu tarixdə ən bahalı futbol matçı olub.

“APA-Economics”in «Daily Star» qəzetinə istinadən məlumatına görə, bu, həm oyuna biletlərin qiymətinə, həm də komandaların qazandığı pulun məbləğinə aiddir.

Final oyununda stadiondakı ən bahalı yerlərə biletin qiyməti 4700 funt olub. Başqa sözlə, bu yerlərin sahibləri final oyununun hər saniyəsinə 1 funt ödəyiblər. İspaniyanın bilet satışı agentliklərinin biri oyuna biletləri 20,4 min funta satıb. Bura bilet pulundan başqa, uçuşun qiyməti, inzibati xərclər və vergilər aiddir.

Final oyunu komandalara və oyunun keçirildiyi ölkəyə 369 mln. avro qazanc gətirib ki, bu da ötən ilkindən 5% artıqdır. Bundan qalib komandaya 126 mln. avro, uduzan tərəfə 73 mln. avro çatıb. Oyundan Londonun şəhər büdcəsinə 52 mln. avro daxil olub ki, bu da ötən il Madridin qazancından 4% artıqdır.

Amma bu oyunda ən böyük qazancı «Barselona»nın ulduz futbolçuları götürüblər. Onlar Britaniya büdcəsinə 2 mln. funt vergi ödəməkdən yaxa qurtara biliblər. «Times» qəzeti aydınlaşdırıb ki, futbolçuların vergidən azad edilməsi UEFA ilə Britaniya hökuməti arasında əldə edilmiş razılaşma nəticəsində mümkün olub. Elə final oyununun «Uembli»də keçirilməsinin şərtlərindən biri də bu olub.

Britaniya qanunlarına görə, xarici idman və şou-biznes ulduzları ölkə ərazisində qazandıqları gəlirdən vergini burda ödəməlidirlər. Amma UEFA rəhbərliyinin xahişi ilə Britaniyanın keçmiş maliyyə naziri Alister Darlinq bu qanunu “bir gecəlik ləğv edib». Nəticədə təkcə «Barselona»nın hücumçusu Lionel Messi bu güzəşt nəticəsində 250 min funt vergi ödəməkdən azad edilib.