Turizm

Ana səhifə

Turizm

“Turizm İli” çərçivəsində Nabranın turizm potensialının təqdimatı ilə bağlı Xaçmaz rayonuna infotur təşkil edilib – FOTOSESSİYA

“Turizm İli” çərçivəsində Nabranın turizm potensialının təqdimatı ilə bağlı Xaçmaz rayonuna infotur təşkil edilib – <font color=red>FOTOSESSİYA </font>

06 iyun 2011 10:20 (UTC +04:00)

Bakı. Ülkər Qasımova-APA. İyunun 4-5-də Mədəniyyət və Turizm Nazirliyinin dəstəyi və dörd ulduzlu “Palma” İstirahət Mərkəzinin təşkilatçılığı ilə Xaçmaz rayonuna infotur təşkil edilib. İnfoturun təşkilində məqsəd Nabranın turizm potensialının təqdimatı olub. APA-nın məlumatına görə, infotur 2011-ci ilin “Turizm ili” elan olunması ilə bağlı regionlarda turizmin müxtəlif növlərini inkişaf etdirmək, turizm xidməti obyektlərinə yerli turizm şirkətlərinin səfərlərini mütəmadi şəkildə təşkil etmək, eyni zamanda daxili turizm bazarının fəallığını artırmaq məqsədilə baş tutub. Layihənin məqsədi respublikanın ən gözəl rayonlarından olan Xaçmazda yerləşən “Palma” İstirahət Mərkəzinin turizm potensialını, mövcud infrastrukturunu, əsas turizm xidmətlərini nümayiş etdirmək və turizm şirkətləri ilə mərkəz arasında aktiv əməkdaşlığı stimullaşdırmaqdır. İnfoturda Mədəniyyət və Turizm Nazirliyi, ölkənin turizm şirkətlərinin əməkdaşları və kütləvi informasiya vasitələri nümayəndələrindən ibarət 120 nəfərlik heyət iştirak edib.

İnfotur ilk əvvəl qədim Şabran şəhərinin qalıqlarına ekskursiya ilə başlayıb. Bu səfər həm də “Palma”nın 10 illik yubileyinə təsadüf edib və elə bu münasibətlə istirahət mərkəzində xüsusi konfrans təşkil edilib. Konfrans iştirakçıları 2011-ci ilin ölkədə turizm ili elan olunduğunu bir daha xatırladaraq, ölkənin turizm sektorunda görüləcək işlərdən söz açdılar. Xaçmaz Rayon İcra Hakimiyyətinin I müavini Akif Mərdanov bildirib ki, il ərzində Xaçmaz rayonun ərazisindəki istirahət mərkəzlərində çoxlu sayda qonaq dincəlir və onların sayı hər il artmaqdadır. “Palma” Ticarət mərkəzinin rəhbəri Qəndalı Məmmədov turizmin inkişafı naminə bütün işləri həyata keçirməyə hazır olduqlarını söyləyib.

Azərbaycan Turizm İnstitutunun prorektoru Eldar Aslanov bu il institutu 300-ə yaxın tələbə bitirəcəyini və həmin tələbələrin ölkənin turizm bazarında çalışmağa başlayacağını diqqətə çatdırıb. “Millenium Tourizm & Conqress” şirkətinin, eyni zamanda “SKAL” Bakı Turizm Professionalları Assosiasiyasının rəhbəri Ruslan Quliyev də çıxışında turizm sahəsində peşəkarların çalışmasının vacib olduğunu deyib: “Azərbaycanda turizm ilinin qeyd olunması tarixi bir şeydir və bununla bağlı tədbirlər planı hazırlanıb. “Azərbaycanda yeni marşrutla kəşf edək” layihəsi çərçivəsində bu il bir neçə silsilə tədbirlər həyata keçirilib. Bu infotur miqyasına görə ilk belə işdir. Məqsəd regionunun turizm potensialını daha dərindən öyrənmək, bölgədə mövcud olan turizm obyektləri ilə və konkret “Palma” İstirahət Mərkəzi ilə turizm şirkətlərinin işgüzar əlaqələrinin yaradılmasıdır. Bu münasibətlərdə bütün müqavilə öhdəlikləri və qiymətlərdə bir sabit rejimin saxlanılması, ümumilikdə bəlli bir endirimlərə nail olmaq da lazımdır. Ən əsas məqsəd bu bölgəyə daha çox xarici turistlər və Azərbaycan vətəndaşlarının cəlb olunmasından ibarətdir. Əslində biz turizmçilər bu ildən çox şey gözləyirik və güman edirəm ki, bu ilin elan olunması da təsadüfi hadisə deyil. Bu 10 ildə turizm sahəsində aparılan uğurlu siyasətin məntiqi davamı kimi qiymətləndirməməlidir”.

Azərbaycan Turizm Assosiasiyası sədrinin müşaviri Müzəffər Ağakərimov ölkə turizminin problemlərinə toxunaraq bildirib ki, Azərbaycan turizminin inkişafının öz modeli və yolu olmalıdır: “Biz Türkiyə, Fransa turizminin 60 ildə keçdiyi yolu birdən etmək istəyirik. Qiymətlərin endirilməsi üçün də zaman lazımdır. Artıq ölkədə turizm sahəsində kəmiyyət göstəricilərindən keyfiyyət göstəriciliyinə keçməyin vaxtıdır”.
Sonra qonaqların şərəfinə “Palma” İstirahət Mərkəzinin milli və Avropa mətbəxinin nümunələrinin təqdim olunduğu restoranında ziyafət təşkil olunub. Millenium Tourizm & Conqress şirkətinin və “Palma” İstirahət Mərkəzinin birgə təşəbbüsü ilə infoturda iştirak edən hər kəsə aktiv iştiraklarına görə sertifikatlar və hədiyyələr təqdim edilib.