Turizm

Ana səhifə

Turizm

Azərbaycanın mədəniyyət və turizm naziri Türkiyənin bir qrup tanınmış iş adamını qəbul edib

01 iyul 2011 12:26 (UTC +04:00)

Bakı. Ülkər Qasımova - APA-Economics. Türkiyənin bir qrup tanınmış iş adamı Azərbaycanda səfərdədir. “APA-Economics”in məlumatına görə, ilk səfər günlərini Qəbələdə keçirən türk iş adamları burada turizmin inkişafından heyrətləniblər.

Bu gün isə mədəniyyət və turizm naziri Əbülfəs Qarayev qonaqları qəbul edib və bir sıra mövzular ətrafında fikir mübadiləsi aparılıb. Ə.Qarayev deyib ki, Türkiyə və Azərbaycan arasında digər sahələrdə olduğu kimi, turizm sahəsi üzrə də geniş əlaqələr var: “İki ölkə turizm sahəsi üzrə qarşılıqlı kadr mübadiləsi aparır. Hazırda Türkiyənin tanınmış turizm menecerləri Azərbaycan Turizm İnstitutunda dərs deyirlər”.

Görüşdə iştirak edən Türkiyə Turizm Yatırımçılar Dərnəyinin (TYD) sədri Turqut Gür bildirib ki, Azərbaycan keçiriləcək “Eurovison-2012” mahnı müsabiqəsi ilə bağlı istənilən köməyi göstərməyə hazırdırlar: “Bu müsabiqə Azərbaycanda keçiriləcəyi üçün ölkənin göstərəcəyi turizm xidmətlərinin keyfiyyəti də yaxşı olmalıdır. Bu, çox önəmli bir məsələdir. Hazırda bir neçə hotel tikilir və müsabiqə ərəfəsində bu hotellər istifadəyə veriləcək. Bundan sonra Bakı daha çox qonaq qarşılamağa hazır olacaq. Bu yöndə nə işlər görülməlidir, bunu müzakirə etməliyik”.

Onun sözlərinə görə, türkiyəli iş adamlarının Azərbaycana səfərlərinin məqsədi Azərbaycanda “Turizm ili”nə dəstək verilməsi və “Eurovision-2012” mahnı yarışmasına hazırlıqda Azərbaycan turizm sektorunun təmsilçilərinə tövsiyələr verməkdir: “Biz Qəbələdə artıq olmuşuq. Burada gördüklərimizə rəğmən deyə bilərik ki, Azərbaycan turizminin çox böyük gələcəyi var. Hotellərdə xidmətin səviyyəsi, personalın hazırlığı bizi çox razı saldı”.

Qeyd edək ki, Azərbaycan Turizm Assosiasiyasının dəvəti ilə iyunun 30-dan Türkiyə Turizm Yatırımçılar Dərnəyinin (TYD) sədri Turqut Gür, TYD-nin İdarə Heyətinin üzvləri Ayhan Bektaş, Can Pulak, Recai Çakır, Türkiyə Səyahət Agentlikləri Birliyinin (TURSAB) sədri Başaran Ulusoy, TURSAB-ın direktoru Ela Atakan, Türkiyə Turistik Otelçilər və İşletimçilər Birliyinin sədri (TUROB) Timur Bayındır, Türkiyə-Azərbaycan İş Şurasının (DEİK) sədri Cengiz Gül Azərbaycana səfərə gəlib. Səfərin məqsədi iki ölkə arasında turizm sahəsi üzrə əməkdaşlığı genişləndirməkdir.