Turizm

Ana səhifə

Turizm

Türkiyə Turizm Yatırımçılar Dərnəyi Azərbaycanda turizmin inkişafına dəstək verəcək

01 iyul 2011 14:53 (UTC +04:00)

Bakı. Əli Əhmədov - APA-Economics. Türkiyə Turizm Yatırımçılar Dərnəyi (TYD) Azərbaycanın turizm sektoruna xarici və türk investorlarının cəlb olunmasına kömək edəcək. «APA-Economics»in məlumatına görə, bu barədə TYD-nin sədri Turqut Gür məlumat verib.

Onun sözlərinə görə, ölkədə turizmin inkişafı üçün xüsusilə Xəzərin sahilində yeni turizm bölgələrinin yaradılmasına ehtiyac var. Təşkilat Azərbaycanda turizmin inkişafına dəstək çərçivəsində yerli hotellərdə çalışan əməkdaşlar üçün treninqlər keçirmək, beynəlxalq aləmdə yerli turizm potensialını təbliğ etmək niyyətindədir.

T.Gürün sözlərinə görə, «Eurovision» mahnı yarışmasını qəbul etmək üçün Azərbaycanın hotel sektorunda çatışmazlıqlar hiss olunur: “Burdakı hotellərin bir hissəsində xidmətlərin səviyyəsi beynəlxalq standartlara cavab vermir”. Bu halı aradan qaldırmaq üçün Azərbaycanın turizm sektorunun əməkdaşlarına Türkiyənin İstanbul, Bodrum, Marmaris və Antalya bölgələrində pulsuz treninqlər keçiriləcək.

Azərbaycanın turizm sektorunda tələb olunan işçilərin sayına gəlincə, T.Gürün sözlərinə görə, Türkiyə təcrübəsi hər 100 hotel nömrəsi üçün 80 işçinin tələb olunduğunu göstərir: «Azərbaycanda tələb olunan işçilərin sayını da bu üsulla hesablamaq olar. Amma yay mövsümündə göstərilən xidmətlərin həcmi və çeşidi artdığına görə tələb olunan işçilər də artır».

T.Gürün sözlərinə görə, turizmin inkişafı ölkədə çoxlu sayda digər sahələrin inkişafına də təsir edir: «Həmin bölgədə elektrik, su istehlakı, ərazi abadlaşır, ərzaq məhsullarının istehlakı və deməli onlara tələbat artır. Onlarla yanaşı, meyvə-tərəvəz, içkilərə də tələbat artır. Eləcə də burdakı avadanlıqlar mebel və elektronika cihazları da yenilənir. Bütün bu sektorlar canlanır».

T. Gür Azərbaycanda son vaxtlar 5 ulduz otellərin sayının artmasını və xarici brendlərin ölkəyə daxil olmasını müsbət hal hesab etsə də, bildirib ki, təkcə 5 deyil, 3 və 4 ulduz otellər də tikilməlidir: «Çünki turistlərin hamısını səviyyəsi və imkanları eyni deyil».