Turizm

Ana səhifə

Turizm

2011-ci ilin “Turizm ili” elan edilməsi ilə bağlı prezident tərəfindən təsdiqlənmiş Tədbirlər Planında bir çox önəmli müddəa yer alıb

25 iyul 2011 16:21 (UTC +04:00)

Bakı. Ülkər Qasımova – APA. Turizm məqsədilə Azərbaycan Respublikasına səfər edən şəxslərin sayının artırılması üçün onlara viza rəsmiləşdirilməsinin sadələşdirilməsinə dair təkliflər hazırlanacaq. APA-nın məlumatına görə, bu məsələ 2011-ci ilin “Turizm ili” elan edilməsi ilə bağlı Azərbaycan prezidenti tərəfindən təsdiq edilmiş Tədbirlər Planında yer alıb. Bu işin icrası Xarici İşlər Nazirliyi, Dövlət Miqrasiya Xidməti, Mədəniyyət və Turizm Nazirliyinə tapşırılıb.

Tədbirlər Planında “Turizm ili” çərçivəsində Xəzər dənizinin sahil ərazilərində çimərlik turizminin inkişaf etdirilməsi məqsədilə müvafiq idarəetmə mexanizminin yaradılmasına dair təkliflərin hazırlanması, turizm sahəsində fəaliyyət göstərən orta və kiçik sahibkarlara dəstək üçün təyinatlı və güzəştli kreditlərin ayrılması, turizm sənayesinin inkişafı üçün iqtisadi mühitin yaxşılaşdırılmasına və investisiyaların cəlb olunmasına dair təkliflərin hazırlanması, qonşu ölkə nümayəndələrinin iştirakı ilə “Sərhədyanı turizmin inkişaf perspektivləri” mövzusunda beynəlxalq konfransın keçirilməsi, turizm şirkətlərində, mehmanxana və restoranlarda çalışanların peşə hazırlığını artırmaq üçün ixtisaslaşdırılmış treninqlərin keçirilməsi, turizm bələdçiləri üçün Bakı və Abşeron yarımadası haqqında vahid metodik vəsaitin hazırlanması və təsdiq edilməsi, müalicəvi su və digər təbii mənbələrin olduğu ərazilərdə müasir tələblərə uyğun rekreasiya-yerləşdirmə obyektlərinin yaradılmasına dair təkliflərin hazırlanması kimi bəndlər yer alıb.

Bununla yanaşı, turizm informasiya mərkəzləri şəbəkəsinin (Qəbələ, İsmayıllı və Bərdə) genişləndirilməsi və onların müasir avadanlıqlarla təchiz edilməsi, “Azərbaycanda palçıq vulkanları” marşrutunun hazırlanması və təqdimatının keçirilməsi, kitabxanaların, informasiya mərkəzlərinin, muzey və təhsil ocaqlarının internet informasiya vasitələrində ölkənin turizm potensialının təbliği ilə bağlı lazımi işlərin görülməsi, mehmanxana və mehmanxana tipli obyektlərin Azərbaycanı təbliğ edən turizm bələdçi kitabı ilə təmin olunması, yerli və xarici turistlər üçün cəlbedici nümayiş obyekti kimi “Basqal” etnoqrafik kənd layihəsinin yaradılması, müvafiq tarix-mədəniyyət obyektlərinin bərpası və müvafiq beynəlxalq nominasiyaya təqdim edilməsi, turizm və nümayiş obyektlərinə (tarix və mədəniyyət qoruqlarına və xüsusi əhəmiyyətli abidələrə) gedən yolların abadlaşdırılması, təmiri, yollarda xüsusi göstəricilərin və yol nişanlarının qoyulması, “Şahdağ” qış-yay turizm kompleksinin yaradılması ilə bağlı işlərin sürətləndirilməsi, turizmin davamlı inkişafı məqsədilə Mədəniyyət və Turizm Nazirliyinin sifarişi əsasında respublika üzrə turizm və rekreasiya zonaları ərazilərinin 1:50000 miqyasında müasir xəritələrinin hazırlanması da Tədbirlər Planında əksini tapıb.

Artıq Mədəniyyət və Turizm Nazirliyində bir neçə layihənin həyata keçirilməsinə başlanıb.