Turizm

Ana səhifə

Turizm

Ən bahalı hotellərə malik şəhərlərin reytinqi açıqlanıb

02 sentyabr 2011 09:54 (UTC +04:00)

Bakı. Nicat Mustafayev – APA-Economics. Böyük Britaniyanın «Hogg Robinson Group» (HRG) tədqiqat şirkəti 2011-ci ilin ilk yarısında ən bahalı hotellərə malik dünya şəhərlərinin reytinqini tərtib edib.

«APA-Economics»in məlumatına görə, HRG-nin apardığı tədqiqatın nəticələrinə əsasən, Moskva (Rusiya) hotellərində nömrələrin qiyməti yenidən ən yüksək həddə çatıb və nəticədə bu şəhər reytinqdə birinci pillədə qərarlaşıb. Belə ki, Moskva hotellərində cari ilin yanvar-iyun aylarında nömrələrin orta qiyməti təxminən 295 avro olub. Bu da 2010-cu ilin analoji dövrü ilə müqayisədə 1% çoxdur, halbuki ötən il Rusiya paytaxtında hotellərdə nömrələrin qiyməti 2009-cu ilə nisbətən 12% aşağı düşmüşdür. Mütəxəssislər Moskvada hazırkı qiymət artımını şəhərdə yeni hotellərin açılması ilə əlaqələndirir.

Siyahıda ikinci və üçüncü yerləri Cenevrə və Sürix (hər ikisi İsveçrə) şəhərləri tutub. Belə ki, Cenevrədə hotel nömrələrinin orta qiyməti 257 avro, Sürixdə isə 249 avro təşkil edib. Ötən ilin eyni dövrünə nisbətən Cenevrədə hotel nömrələrinin qiyməti 13%, Sürixdə isə 17% artıb.

Reytinqdə ilk beşliyi Paris (Fransa) və Stokholm (İsveç) şəhərləri tamamlayır. Dördüncü yerdə qərarlaşan Paris hotellərində nömrələrin orta qiyməti 235 avro təşkil edib ki, bu da ötən ilin yanvar-iyun ayları ilə müqayisədə 5% çoxdur. Stokholm hotellərində isə qiymət ötən ilin analoji dövrü ilə müqayisədə 10% artaraq 228 avroya çatıb.

Reytinqin ilk onluğuna həmçinin Vaşinqton (ABŞ), Sidney (Avstraliya), İstanbul (Türkiyə), Nyu-York (ABŞ) və Oslo (Norveç) şəhərləri daxil olub.

Ümumiyyətlə, 2011-ci ilin ilk yarısında dünyada hotel xidmətləri orta hesabla 4% bahalaşıb. Belə ki, HRG şirkətinin 50 şəhər üzrə apardığı tədqiqat nəticəsində sözügedən sahədə 33 şəhərdə qiymət artımı qeydə alınıb. Hesabat dövründə ən yüksək qiymət artımı (37%) İstanbulda müşahidə olunub. Regionlar arasında isə ən bahalı qiymətlər Asiya və Sakit Okean regionunda qeydə alınıb. Sözügedən regionda cari ilin yanvar-iyun aylarında orta hesabla 7% bahalaşma olub.

Şərqi Avropa reygionunda isə qiymətlər 6,6% aşağı düşüb. Mütəxəssislərin fikrincə, qiymət azalması bir qədər də artıq ola bilərdi. Lakin Kiyev (Ukrayna) və Buxarest (Rumıniya) şəhərlərinin hotellərindəki qiymətlər buna mane olub. Belə ki, sözügedən şəhərlərdə 4%-lik qiymət artımı qeydə alınıb.

Böyük Britaniyada cari ilin yanvar ayında əlavə dəyər vergisinin artırılmasına baxmayaraq, hotellərdə nömrələrin qiymətləri cüzi (2%) artaraq orta hesabla 177 avro təşkil edib.

Hesabat dövründə Şimali Amerika regionunda hotel nömrələrində qiymətlərin artımı təxminən 4% təşkil edib. Los-Anceles (ABŞ), Toronto və Monreal (hər ikisi Kanada) şəhərlərin istisna olmaqla, bütün digər şəhərlərdə qiymət artımı qeyd alınıb.