Turizm

Ana səhifə

Turizm

“Turizmin inkişafı media müstəvisində” mövzusunda dəyirmi masa keçirilib

20 sentyabr 2011 10:20 (UTC +04:00)

APA-nın məlumatına görə, Mətbuat Şurasının sədri Əflatun Amaşov bildirib ki, il ərzində turizmlə bağlı KİV-də hazırlanan materialların 34 faizi reportaj, 30 faizi isə analitik xarakterli olub.

Tədbirdə iştirak edən mədəniyyət və turizm naziri Əbülfəs Qarayev media nümayəndələri qarşısında məruzə ilə çıxış edib. Nazir bu günə qədər ölkədə turizmin inkişafı ilə bağlı üç dövlət proqramı hazırlandığını söyləyib: “Azərbaycan dövləti turizm sektorunda fəaliyyət göstərən müəssisələrin qeyri-dövlət obyektləri kimi fəaliyyətində maraqlıdır. Mən həmişə tədbirlərdə bildirirəm ki, Azərbaycanda turizm sənayesində çalışanlar “kabab turizmi”ndən əl çəkməlidirlər. İnkişaf etməkdə olan turizm sənayesində yeni xidmətlər təklif olunmalıdır. Biz bu istiqamətdə öz işimizi görürük. Yəni turizmin inkişafı bir nazirdən, insandan və ya şirkətdən asılı deyil. Ölkədə çoxtərəfli inkişafın özü də turizmin inkişafına stimul yaradır”.

Ə. Qarayev bildirib ki, 2006-cı ildə ölkə muzeylərinə 1 milyon 22 min ziyarətçi gəlmişdirsə, 2010-cu ildə bu rəqəm 1 milyon 589 min olub. O, nəqliyyat sferasında görülən işlərin də turizmin inkişafı üçün əhəmiyyətli rol oynadığını deyib: “Paytaxtda və bölgələrdə xidmət peşəkarlığının artırılması məqsədilə tədrislə bağlı işlərə də başlanacaq. Kolleclərdə turizmə dair tədris bölmələri açılacaq”.

APA İnformasiya Agentliyinin baş direktoru Vüsalə Mahirqızı çıxışında turizm müəssisələrinin online fəaliyyətinin, həmçinin KİV-lə əməkdaşlığının səviyyəsini qənaətbəxş olmadığını diqqətə çatdırıb. O bəyan edib ki, mehmanxanaların və istirahət mərkəzlərinin internet saytları online rejimində işləmir, xarici dillərə üstünlük verilmir, Azərbaycana gələn təyyarələrdə turistlərə ölkənin turizm müəssisələri, tarixi abidələri ilə bağlı məlumatları əks etdirən jurnallar təqdim olunmur.

“Olaylar” İnformasiya Agentliyinin direktoru Yunus Oğuz, “İki sahil” qəzetinin baş redaktoru Vüqar Rəhimzadə və digər KİV rəhbərləri də mövzu ilə bağlı təklif və rəylərini açıqlayıblar.