Turizm

Ana səhifə

Turizm

Bakıda Ümumrespublika daxili turizm konfransı keçirilib - FOTOSESSİYA

Bakıda Ümumrespublika daxili turizm konfransı keçirilib - <font color=red>FOTOSESSİYA</font>

27 sentyabr 2011 14:48 (UTC +04:00)

Bakı. Ülkər Qasımova - APA-Economics. Bu gün Bakıda Ümumdünya Turizm Günü münasibətilə Ümumrespublika daxili turizm konfransı və kollegiya iclası keçirilib. “APA-Economics”in məlumatına görə, tədbirdə rayon mədəniyyət və turizm şöbələrinin müdirləri, turizm şirkətləri və mehmanxana rəhbərləri iştirak edib.

Tədbiri açıq elan edən mədəniyyət və turizm naziri Əbülfəs Qarayev ilk olaraq bu gün münasibətilə hər kəsi təbrik edib. Nazir bildirib ki, bu gün Ümumdünya Turizm Təşkilatına üzv olan 165 ölkədə, o cümlədən 2001-ci ildən etibarən Azərbaycanda qeyd olunur.

Mədəniyyət və Turizm Nazirliyinin turizm şöbəsinin müdiri Aydın İsmiyev ölkədə turizmin inkişafı istiqamətində görülən işlərdən danışıb. O, hazırda ölkədə beş ulduzlu hotellərlə yanaşı, 46 turizm obyektinin tikildiyini qeyd edib.

A.İsmiyev regionlarda fəaliyyət göstərən turizm obyektlərində çalışanların peşə hazırlığının səviyyəsindən narazılıq edib: “İşçilərin peşə hazırlığı yox səviyyəsindədir. Xidmət səviyyəsinin aşağı olması xarici və yerli turistlərin haqlı narazılığına səbəb olur. Nazirlik bu nöqsanların aradan qaldırılması üçün müxtəlif kurslar təşkil edir”.

Konfransda Milli Məclisin Sosial siyasət komitəsinin sədri Hadı Rəcəbli, Azərbaycan Turizm İnstitutunun rektoru Cəfər Cəfərov və başqaları çıxış edib.

Daha sonra Mədəniyyət və Turizm Nazirliyi tərəfindən turizm sahəsində çalışan müəssisələr və şəxslər fərqlənmə diplomları ilə təltif olunublar. Ardınca Bakı Turizm İnformasiya Mərkəzi tərəfindən II Milli Turizm mükafatlarının təqdimatı keçirilib.

Qeyd edək ki, bu gün axşam Milli Parkda Ümumdünya Turizm Gününə həsr olunmuş konsert proqramı da olacaq. Hazırda isə milli parkda əl sənətkarlıq nümunələrinin sərgisi davam etməkdədir.