Turizm

Ana səhifə

Turizm

Azərbaycandakı otellərin ulduzlaşdırma dərəcəsi yoxlanacaq

05 oktyabr 2011 10:30 (UTC +04:00)

APA-nın məlumatına görə, bunu jurnalistlərə açıqlamasında mədəniyyət və turizm naziri Əbülfəs Qarayev deyib.

Nazir bildirib ki, bu istiqamətdə aparılan işlər davam etdirilir və müvafiq dövlət orqanlarına müraciət olunub. Eyni zamanda, məsələ ilə bağlı yerlərdə monitorinq keçirilir: «Biz Ümumdünya Turizm Günündə keçirilən konfransda da demişdik ki, Azərbaycanda lisenziya əldə etməmiş şirkətlər qalmamalıdır. Çalışacağıq ki, verdiyimiz sözə əməl edək və ilin sonuna qədər ölkədəki bütün otellər artıq lisenziyalaşdırılacaq».

Ə.Qarayev ölkədə fəaliyyət göstərən otellərin keyfiyyət göstəricisi məsələsinə də toxunub və bildirib ki, bununla bağlı dünyada tətbiq olunan norma və standartlar mövcuddur: «Bu standartlar Azərbaycanda Standartlaşdırma, Metrologiya və Patent üzrə Dövlət Komitəsi tərəfindən təsdiq olunub. Həmin normalara uyğun olaraq biz otellərin təsnifatının keçirilməsini təmin edirik. Bu vaxta qədər bu proses könüllü olub. Təsnifatını, ulduz dərəcəsini alıb-almaması otelin öz öhdəsinə qalırdı. Otellər məcburi qaydada yalnız lisenziya almalıdır. Lakin xidmətlərin keyfiyyətinin artırılması məqsədilə xüsusi təklif irəli sürmüşük və bu məsələ yeni qanun layihəsində əksini tapıb. Bu da ondan ibarətdir ki, Azərbaycanda standartlara uyğun olaraq otellərə ulduzlaşdırma dərəcəsi müəyyənləşsin və bununla da fəaliyyətdə olan otellərin hansı dərəcədə bu şərtlərə cavab verdiyi məlum olacaq».

Nazir onu da bildirib ki, hazırda Azərbaycanda 470-dən artıq otel mövcuddur və hər il ölkədə 40-45 otelin inşası aparılır: «Hazırda Azərbaycanda 42 yeni otel inşa olunur».