Turizm

Ana səhifə

Turizm

Azərbaycanda qeyri-ənənəvi turizm sahələrinin inkişafı müzakirə edilib

01 noyabr 2011 12:50 (UTC +04:00)

Bakı. Azər Mustafayev – APA. Azərbaycan Regional İnkişaf Mərkəzi “Azərbaycanda qeyri-ənənəvi turizm sahələrinin inkişaf etdirilməsi” mövzusunda mətbuat konfransı keçirib. APA-nın məlumatına görə, tədbirdə qeyri-neft sektorunun, turizmin, əsasən də qeyri-ənənəvi turizm sahələrinin inkişafı yolları müzakirə olunub.

Regional İnkişaf Mərkəzinin direktoru Çingiz İsmayılov bildirib ki, Ümumdünya İqtisadi Forumunun hazırladığı rəqabətliliyin reytinq cədvəlinə əsasən Azərbaycan MDB-də 3-cü, dünyanın 189 ölkəsi arasında isə 83-dür: “Statistika onu göstərir ki, əvvəlki illərə nisbətən geriləmə var. Bu da ölkədə son illər turizmin müxtəlif sahələrinin zəif inkişafı ilə bağlıdır. Buna görə də keçən il Azərbaycandan qonşu Gürcüstana istirahət məqsədilə 500 min vətəndaşımız gedib. Bu isə bizim büdcəmizdən 350 milyon dollar vəsaitin itirilməsi deməkdir”.

Ç. İsmayılov deyib ki, bütün bunların qarşısını almaq üçün ölkədə avtoturizm, çay turizmi və başqa sahələrin inkişaf etdirilməsi lazımdır: “Dağlıq rayonlarda turizm müəyyən mənada inkişaf etsə də, Aran rayonlarında turizm mərkəzləri demək olar ki, yoxdur. Azərbaycan ərazisindən keçən Kür çayının 906 km-dən 500 km-ə qədər olan hissəsi - Neftçala və Mingəçevir arası çay turizmi üçün çox əlverişlidir. Gəmilərin hərəkəti çayın müəyyən yerlərində lil çöküntüsünün toplanmasının qarşısını alar, suyun səviyyəsinin qalxmasına imkan verməz. Çay turizminin inkişafı balıqçılığın da inkişafına səbəb olar. Ölkədə ilk növbədə kiçik və orta sahibkarlığın inkişafı vacibdir”.

Turizm İnstitutunun professoru Bahadur Bilalov deyib ki, turizm Azərbaycanda hələ ötən əsrin sonlarında inkişaf edib, sadəcə, iqtisadi əhəmiyyət daşımayıb: “Burada pul qazanmaqdan çox sovet insanının rahat şəraitdə istirahət etməsi nəzərdə tutulub. İndi artıq bütün dünyada turizm gəlirli bir sahəyə çevrilib. Azərbaycanda qeyri-ənənəvi turizm sahələrinin inkişafı üçün dövlətin bu sahəyə qayğısı lazımdır”.

Daha sonra Aran rayonlarının sahibkarları öz təkliflərini irəli sürüblər.